काठमाडौं । दक्षिण अमेरिकी मुलुक भेनेजुएला र गणतन्त्र गयानाबीच तनाव उत्पन्न भएको छ । दक्षिण अमेरिकी देशहरूले भने दुवै देशलाई शान्ति कायम राख्न भनेका छन् ।
भनेजुयलाले गयानाको तेल खानी क्षेत्र एसेकिबोलाई कब्जा गर्ने पक्षमा जनमत सङ्ग्रह भएपछि दुई देशबीच तनाव बढेको हो । क्षेत्रीय समूह मार्कोसुरले एकपक्षीय कार्यले थप तनाव सृजना हुने भन्दै दुवै देशलाई विवादको शान्तिपूर्ण माध्यमद्वारा हल गर्न आग्रह गरेको छ ।
भेनेजुएलाका राष्ट्रपति निकोलास माडुरोले एसेकिबोमा सार्वजनिक ग्यास उद्योगलाई तेल उत्खनन् गर्न निर्देशन दिएका छन् । ब्राजिलका राष्ट्रपति लुला इनासियो दा सिल्भाले गहिरो चिन्ता व्यक्त गर्दै द्वन्द्व नचाहेको र शान्ति प्रवर्धन हुनुपर्ने टिप्पणी गरेका छन् । ब्राजिलले पनि सीमा क्षेत्रमा सैनिक उपस्थिति बढाएको छ । अमेरिकाले गयानालाई समर्थन गरेको छ ।
एसेकिबो क्षेत्रलाई भेनेजुएलाले उपनिवेश पूर्वको आफ्नो दाबी गरेको छ । सन् १८ सय ९९ मा अन्तर्राष्ट्रिय मध्यस्थताकर्ताले औपनिवेशिक बेलायत र हल्याण्ड नियन्त्रित क्षेत्र गयानालाई सुम्पने निर्णय गरेका थिए ।
