काठमाडौं । रुसमा एक विमान दुर्घटनामा परी रुसी निजी सैन्य समूह ‘वाग्नर ग्रुप’ का प्रमुख येभ्गेनी प्रिगोजिनसहित १० जनाको मृत्यु भएको छ ।
गत जुनमा भएको छोटो र असफल सैन्य विद्रोहका नेता प्रिगोजिनसहित १० जनाको मृत्यु भएको रुसी नागरिक उड्डयन प्राधिकरणले जनाएको छ । बुधबार एउटा रहस्यमय विमान दुर्घटनामा उनीहरुको मृत्यु भएको हो ।
विमानमा सवार १० व्यक्तिहरुको सूचीमा प्रिगोजिनका साथै वाग्नर ग्रुप सह-संस्थापक रहेका दमित्री उत्किनको नाम पनि रहेको प्राधिकरणले जनाएको छ । मस्कोबाट सेन्ट पिटर्सबर्गतर्फ उडेको उक्त निजी विमान कुजेन्किनो गाउँ नजिकै दुर्घटना भएको रुसको आपतकालीन मन्त्रालयले जनाएको छ । दुर्घटनास्थलमा १० वटा शव फेला परेको त्यहांको सरकारी समाचारमाध्यमले जनाएको छ । विमानमा चालक दलका तीन र अन्य सात जना गरी १० जना रहेका जनाइएको छ ।
गत जुन २३ मा प्रिगोजिनले रक्षा मन्त्रालयको नेतृत्वप्रति असन्तुष्टि जनाउँदै सैन्य विद्रोहको घोषणा गरेका थिए । यद्यपि त्यसको २४ घण्टाभित्रै उनले विद्रोह फिर्ता लिएको घोषणासमेत गरेका थिए । प्रिगोजिनको उक्त विद्रोहलाई राष्ट्रपति भ्लादिमिर पुटिनका लागि उनी सत्तामा आए यताकै सबैभन्दा ठूलो चुनौतीका रुपमा हेरिएको थियो ।
बेलारुसका राष्ट्रपति एलेक्जेण्डर लुकासेन्कोको पहलमा प्रिगोजिनले उक्त विद्रोह फिर्ता लिए पनि उनले आगामी दिनमा कुनै यस्तै अप्रत्याशित नियति भोग्नु पर्ने आशंका त्यति बेलै गरिएको थियो । प्रिगोजिन अन्तिम पटक करिब एक साताअघि एउटा भिडियोमा देखा परेका थिए जुन अफ्रिकाको कुनै अज्ञात स्थानमा रेकर्ड गरिएको बताइएको थियो ।
अमेरिकी राष्ट्रपति जो बाइडनले प्रिगोजिनको मृत्युबाट आफू आश्चर्यचकित नभएको प्रतिक्रिया दिएका छन् ।
