काठमाडौं । भारतको ओडिसा राज्यस्थित गन्जम जिल्लामा बस दुर्घटना हुँदा ११ जनाको मृत्यु भएको छ ।
उक्त दुर्घटनामा आठ यात्रु सिकिस्त घाइते भएका छन् । घाइतेलाई स्थानीय एमकेसीजी मेडिकल कलेजमा भर्ना गरिएको बीबीसीले जनाएको छ ।
गन्जमका जिल्लाअधिकारी दिव्या ज्योतिलाई उदृत गर्दै समाचार एजेन्सी एएनआईले घटनाको जाँच भइरहेको जनाएको छ ।
ओडिसाका मुख्यमन्त्री नवीन पटनायकले दुर्घटनाप्रति दुःख व्यक्त गरेका छन् । साथै उनले मृतकका परिवारलाई ३–३ लाख रुपैयाँ सहायता प्रदान गर्ने घोषणा गरेका छन् ।
ओडिसा राज्य सडक परिवहन निगमको बस र एक निजी बस आपसमा ठोक्किएर दुर्घटना भएको अधिकारीहरुले जानकारी दिएका छन् ।
निगमको बसमा सवार यात्रुलाई सामान्य चोट लागेको छ भने अधिकांश मृत्यु हुनेहरु निजी बसमा सवार यात्रु रहेको भारतीय सञ्चारमाध्यमले जनाएका छन् ।
