काठमाडौं । थाइल्यान्डका नयाँ प्रधानमन्त्री पेतोङत्रान सिनावात्राले पद तथा गोपनीयताको शपथ लिनुभएको छ ।
नव नियुक्त प्रधानमन्त्री पेतोङत्रानसहित ३५ जना मन्त्रीहरूले थाई नरेश महा वजिरालोङकोर्न समक्ष शपथ लिएका हुन् । यससँगै थाइल्याण्डमा एक महिनादेखिको राजनीतिक गतिरोधको अन्त्य भएको छ ।
३५ सदस्यीय मन्त्रिपरिषद्मा ८ जना महिला रहेको अन्तर्राष्ट्रिय सञ्चारमाध्यमले जनाएका छन् । जुन थाइल्याण्डको इतिहासमा नयाँ रेकर्ड हो ।
श्रेथा थाभिसिनलाई नैतिकताको उल्लंघन गरेको आरोपमा अदालतले प्रधानमन्त्री पदबाट बर्खास्त गरेपछि सत्तारुढ फेउ थाई पार्टीकी नेतृ ३८ वर्षीया पेतोङत्रानलाई गत महिना संसद्ले थाइल्याण्डको सबैभन्दा कान्छी प्रधानमन्त्री बन्न निर्वाचित गरेको थियो ।
राजनीतिक अस्थिरताको कारण विकास र लगानी ठप्प भएको दक्षिणपूर्वी एसियाको दोस्रो ठूलो अर्थतन्त्र थाइल्याण्डको नेतृत्व पेतोङत्रानले लिनुभएको छ ।
