सप्तरी । सप्तरीको छिन्नमस्ता गाउँपालिका-५ लोखरमस्थित मुसहर वस्तीमा दुई सातादेखि फैलिएको हैजाको प्रकोप सुधारोन्मुख भए पनि अझै पूर्ण नियन्त्रणमा आउनसकेको छैन ।
अहिले पनि सदरमुकाम राजविराजस्थित गजेन्द्रनारायण सिंह अस्पतालमा सात जनाको उपचार भइरहेको छ । त्यस्तै लोखरमस्थित स्वास्थ्यचौकीमा दुई जनाको भर्ना गरेर उपचार थालिएको छ भने नाै जनालाई चिकित्सकको निगरानीमा घरमै उपचार भइरहेको छ । स्वास्थ्य विभागले बिहीबारदेखि लोखरममै एक जना एमएमबीबीएस चिकित्सकलाई परिचालन गरेको र पालिकाका अन्य स्वास्थ्यकर्मीसँगै उपचारसहित औषधि वितरणको कार्य पनि गरिरहेको छ ।
यसअघि आरडीटी प्रविधिबाट हैजा प्रमाणित भएकाहरूमा प्रादेशिक प्रयोगशाला जनकपुरमा गरिएको कल्चर परीक्षणमा पनि हैजा पुष्टि भइसकेको छ । अहिलेसम्म हैजा फैलिनुको कारण पत्ता नलागे पनि वस्तीमा शौचालय नभएको, फोहोरको दुर्गन्ध र खानेपानीको चरम अभाव देखिएको छ ।
पालिकाले गैरसरकारी संस्थाको सहयोगमा सरसफाइ सुरू गरेको छ भने पानी शुद्धीकरणका लागि ३० वटा फिल्टर वितरण गरेको जनाएको छ । यस्तै पालिकाले स्वास्थ्य कार्यालयसँगको समन्वयमा संक्रमित वस्तीको चापाकल, पोखरी र खोला गरी सातवटा पानीको नमूना परीक्षणको काम पनि थालेको छ ।
हैजा सङ्क्रमित ४४ जना उपचारपछि घर फर्किसकेका छन् । झाडापखालाबाट गत कात्तिक ६ गते लोखरमका बुचन सदाका एक वर्षका छोरा, ११ गते ६६ वर्षीय बुबा र १४ गते चार वर्षीया छोरीको उपचार अभावमा ज्यान गएको थियो ।
.png&w=400&height=300)
