गोरखा । गोरखाको अजिरकोट गाउँपालिका-३ मा रहेको भच्चेक आधारभूत अस्पताललाई फ्रान्सेली विद्यार्थीले ४२ लाख रूपैयाँ बराबरको स्वास्थ्य उपकरण सहयोग गरेका छन् ।
फ्रान्सका पेरिस सिटी, ग्रेनोबल र मार्सेई विश्वविद्यालयमा चिकित्साशास्त्र अध्ययनरत विद्यार्थीले यस्तो सहयोग गरेका हुन् । सहयोगका लागि उनीहरूले फ्रान्समै आलु चिप्स तथा केक बिक्री, सांगीतिक कार्यक्रम र खाजाको पैसासमेत जोगाएर पैसा जम्मा गरेको बताएका छन् ।
फ्रान्सेली विद्यार्थीले शल्यक्रिया कक्षका लागि बेडसहितको उपकरण, एनेस्थेसिया उपकरण, एचडीयु बेड, अनलाइन युपिएसलगायतका सामग्री अस्पताललाई हस्तान्तरण गरेका छन् ।
गाउँपालिकाअन्तर्गतको यो अस्पतालले आवश्यक पर्ने उपकरण पाएकोमा जनप्रतिनिधि र चिकित्सकसमेत गुणस्तरीय सेवा प्रदान गर्न सक्नेमा ढुक्क भएका छन् ।ग्रामीण भेगको यो अस्पतालसम्म सहयोग गर्न विद्यार्थीहरू फ्रान्सस्थित मनोज एसोसिएसन र मुटु फाउण्डेसनको समन्वयमा आइपुगेका हुन् ।
फ्रान्सेली विद्यार्थीको उक्त समूहले विपन्न तथा सीमान्तकृत २ सय २० जना स्थानीयको स्वास्थ्य बीमाको रकमसमेत सहयोग गरेको छ ।