काठमाडौं । ललितपुरस्थित नेपाल मेडिसिटी अस्पतालमा पहिलो पटक कलेजो प्रत्यारोपण गरिएको छ । मिर्गौला तथा कलेजो दुवै बिग्रिएर जटिल स्वास्थ्य अवस्थामा रहेका ५३ वर्षीय ईश्वरबहादुर कार्कीको कलेजो प्रत्यारोपण गरिएको हो ।
ईश्वरबहादुरलाई २६ वर्षीय छोरा आयुषले कलेजो दान गर्नुभएको हो । प्रत्यारोपण गर्न भन्दै भारत पुगेपनि चित्तबुझ्दो परामर्श नपाएपछि उहाँहरू नेपाल मेडिसिटी अस्पताल आउनुभएको थियो । अहिले बिरामीको अवस्थामा सुधार हुँदै गएको छ ।
भारतको अमृता अस्पतालसँगको सहकार्यमा नेपाल मेडिसिटिका चिकित्सकहरूको नेतृत्वमा कलेजो प्रत्यारोपण गरिएको हो । जटिल मानिएको कलेजो प्रत्यारोपणको निरन्तरतासँगै थप सेवा विस्तार गर्दै लैजाने अस्पतालले जनाएको छ ।
नेपालमा बर्सेनि २ सय जनाको कलेजो प्रत्यारोपण गर्नुपर्ने बिरामी आउने गरेको चिकित्सकहरूले बताउँदै आएका छन् । तर कलेजो प्रत्यारोपण सेवा सुरू भएको ८ वर्ष भए पनि अहिलेसम्म जम्मा करिब ५० जनाको मात्र प्रत्यारोपण भएको छ ।
