धनगढी। दूरदराजका नागरिकलाई गाउँमै विशेषज्ञ स्वास्थ्य सेवा उपलब्ध गराउने उद्देश्यले लालझाडी गाउँपालिका स्वास्थ्य शाखाले बिहीबार निःशुल्क एकीकृत विशेषज्ञ स्वास्थ्य शिविर सञ्चालन गरेको छ ।
लालझाडी आधारभूत अस्पताल, नन्द गाउँमा आयोजित शिविरमा सेवाग्राहीको उल्लेख्य उपस्थिति देखियो । केयरटेकर हस्पिटल प्रा.लि. धनगढीको प्राविधिक सहयोगमा सञ्चालन गरिएको शिविरमा हाड जोर्नी तथा नसा रोग, जनरल फिजिसियन, दन्त उपचार, आँखा जाँच, एक्स-रे, इसीजी र रगत परीक्षणजस्ता सेवा निःशुल्क प्रदान गरियो ।
विशेष गरी महिलाहरूका लागि पाठेघरको मुखको क्यान्सर परीक्षण सेवा सञ्चालन गरियो । रोगको प्रकृति अनुसार औषधि निःशुल्क वितरण गरिनुका साथै जटिल बिरामीलाई थप उपचारका लागि रेफरल सेवासमेत उपलब्ध गराइयो । बिहिबार सञ्चालन भएको शिविरबाट दुई सयभन्दा बढी नागरिक प्रत्यक्ष लाभान्वित भएका छन् ।
हालै निर्माण सम्पन्न भएको लालझाडी आधारभूत अस्पताल अनौपचारिक रूपमा सञ्चालनमा छ । तर, अस्पतालमा हाल एक जना मात्रै विशेषज्ञ चिकित्सक कार्यरत छन् । आवश्यक जनशक्ति, थप विशेषज्ञ चिकित्सक तथा आधुनिक स्वास्थ्य उपकरणको अभाव अझै देखिन्छ ।
स्थानीयबासीले अस्पताललाई पूर्ण क्षमतामा सञ्चालन गर्न थप सेवा विस्तारको माग गरेका छन् । सामान्य अवस्थामा विशेषज्ञ सेवा लिन धनगढी वा महेन्द्रनगर पुग्नुपर्ने बाध्यता यहाँका स्थानीयलाई छ । गाउँमै यस्ता शिविर सञ्चालन हुँदा तत्काल राहत मिलेको छ । तर, दीर्घकालीन समाधानका लागि अस्पतालमै पर्याप्त चिकित्सक र उपकरण आवश्यक देखिन्छ ।
गाउँपालिकाले अस्पतालमा क्रमशः थप विशेषज्ञ चिकित्सक, आवश्यक उपकरण र सेवा विस्तार गर्ने योजना बनाएको जनाएको छ । ग्रामीण नागरिकलाई गुणस्तरीय स्वास्थ्य सेवा आफ्नै स्थानीय तहबाट उपलब्ध गराउने लक्ष्यसहित पूर्वाधार र सेवामा थप लगानी गरिने पालिकाको भनाइ छ ।
.png&w=400&height=300)
.png&w=350&height=150)
