काठमाडौं । कच्चा पदार्थ अभाव भएपछि आयुर्वेदिक औषधि उत्पादन गर्ने सरकारको एक मात्र संस्था सिंहदरबार वैद्यखाना विकास समितिले औषधि उत्पादन नै बन्द गरेको छ ।
पछिल्लो समय ५ प्रकारका औषधि उत्पादन गर्दै आएको सिंहदरबार वैद्यखाना विकास समितिले अहिले कुनै पनि औषधि उत्पादन गर्न छाडेको हो । समितिका अनुसार उत्पादन भएकै सिलाजित प्याकिङ्ग गर्न समेत डब्बाको अभाव छ । कच्चा पदार्थदेखि आवश्यक सामग्री एउटै सप्लायर्सले ठेक्का पाउने र ठेक्का पाएपछि सामान समयमा नदिँदा समस्या भएको वैद्यखानाका हो । सप्लायर्ससँगै कर्मचारीले काम नगर्ने र सरकारले पनि चासो नदिँदा औषधि उत्पादन गर्न नसकिएको समितिका कार्यकारी निर्देशक डा. प्रदीप केसीले बताउनु भयो ।
स्वास्थ्य तथा जनसंख्या मन्त्रालयका प्रवक्ता डा. प्रकाश बुढाथोकीले भने सिंहदरबार वैद्यखानाको अवस्थाबारे जानकारी रहेको र समस्या समाधान गर्न गृहकार्य भइरहेको जनाउनु भयो ।
सिंहदरबार वैद्धखाना विकास समितिको इतिहास ४ सय वर्षभन्दा लामो छ । यहाँबाट कुनै बेला १ सय ५० प्रकारका औषधि उत्पादन हुने गरेका थिए । तर, राजनीतिक हस्तक्षेप र असहयोगका कारण वैद्यखाना अहिले कुनै पनि औषधि उत्पादन गर्न नसक्ने अवस्थामा पुगेको हो ।
