काठमाडौं । चिकित्सा शिक्षा आयोगले प्रमाणपत्र तहको स्वास्थ्य शिक्षा अध्यापनका लागि डेढ दर्जन शिक्षण संस्थालाई सम्बन्धन दिने निर्णय गरेको छ ।
आयोगका अध्यक्षसमेत रहेका प्रधानमन्त्री केपी शर्मा ओलीको अध्यक्षतामा बसेको बैठकले नर्सिङ, एचए, फार्मेसीलगायत विषय अध्यापनका लागि ती संस्थाहरुलाई सम्बन्धन दिने निर्णय गरेको उपाध्यक्ष डाक्टर अञ्जनीकुमार झाले जानकारी दिनुभयो । बैठकले ६ वटा शिक्षण संस्थालाई आशयपत्र दिने निर्णयसमेत गरेको छ ।
बैठकमा प्रधानमन्त्री ओलीले निजी मेडिकल कलेजहरुमा स्नातकोत्तर तह-पिजी अध्ययनका विषयमा देखिएको विवाद आपसी छलफलबाट समाधान गर्न निर्देशन दिनुभएको छ। आवासीय चिकित्सक अध्ययनका विषयमा देखिएको समस्या समाधानका लागि शिक्षा, स्वास्थ्य मन्त्री र आयोगलाई प्रधानमन्त्रीले निर्देशन दिनुभएको हो ।
स्वास्थ्य मन्त्रालयले निजी कलेजका आवासीय चिकित्सकलाई आठौँ तहको सरकारीसरह मासिक ४८ हजार सुविधा कायम गर्न निर्देशन दिएपछि विवाद उत्पन्न भएको हो । बैठकले आयोगको चालु आर्थिक वर्षको बजेट र नीति तथा कार्यक्रम संशोधनसहित पास गरेको सदस्य-सचिव कृष्णा काप्रीले जानकारी दिनुभएको छ ।
