काठमाडौं । देशको एक मात्र केन्द्रीय बाल अस्पतालमा बिरामीको संख्या बढेको छ । मौसममा परिवर्तन हुन थालेसँगै कान्तिबाल अस्पतालमा बिरामीको चाप बढेको हो ।
अस्पतालका अनुसार मौसमी रुघाखोकी, डेंगी, निमोनियालगायतको समस्या लिएर आउनेहरु धेरै छन् । अघिल्लो महिनासम्म प्रतिदिन झन्डै ७ सय बिरामी आउने गरेकोमा अहिले दैनिक १ हजारको हाराहारीमा उपचारका लागि आउने गरेका छन् । ७० प्रतिशत त रुघाखोकीको समस्या लिएर आउने गरेको अस्पतालले जनाएको छ । बिरामीको चाप बढेपछि उपचार गर्नै अस्पताललाई हम्मेहम्मे परेको छ ।
कान्ति अस्पतालमा अघिल्लो महिना ३ सय जनाको डेँगी परीक्षण गर्दा ९० जनामा संक्रमण पुष्टि भएको थियो । २० जनालाई त अस्पताल भर्ना गरेरै उपचार गर्नुपरेको अस्पतालले जनाएको छ । अहिले पनि अस्पतालमा ३ जना डेंगीका बिरामी भर्ना भएका छन् ।
यो अस्पतालको वार्डमा मात्रै अहिले २ सय २४ बालबालिकाको उपचार भइरहेको छ । बालबालिकालाई कडा ज्वरो आएमा, स्वास फेर्न गार्हो भएमा, ओठ-मुख निलो भएमा तुरुन्तै अस्पताल पुर्याउनुपर्ने चिकित्सक बताउँछन् ।
अस्पतालले दसैंअघिसम्म बिरामीको चाप नै रहने अनुमान गरेको छ । मौसम परिवर्तन हुने बेला बालबालिकाको स्वास्थ्यमा सतर्कता अपनाउनसमेत अस्पतालले आग्रह गरेको छ ।
