सल्यान । पूजाको प्रसाद खाँदा सल्यानमा एकै गाउँका झन्डै दुई सयजना बिरामी परेका छन् ।
जिल्लाको बागचौर नगरपालिका ५, धारापानीस्थित बाहुनठानामा प्रेमबहादुर खत्रीको घरमा लगाइएको सत्यनारायणको पूजाको प्रसाद खाँदा झन्डै दुई सयजना बिरामी भएका हुन् । बिरामी भएकामा झाडापखाला, पेट दुख्ने, चक्कर लाग्ने, ग्यास बढ्ने समस्या देखिएको छ ।
फुड प्वाइजनका कारण बालबालिका, बुढाबुढी तथा युवा सबै बिरामी परेका छन् । बिरामी भएका सबैलाई उपचारका लागि बागचौर नगरपालिकाले घरमै पुगेर स्वास्थ्यकर्मीलगायत औषधिको व्यवस्था गरेको छ ।
बिरामी भएका सबै अहिले खतरामुक्त रहेको र केहीमा अलिक बढी समस्या देखिए पनि उनीहरु घरमै बसेर उपचार गराइरहेका बागचौर नगरपालिका स्वास्थ्य शाखाले जनाएको छ । बिरामी भएका पाँच जनालाई स्वास्थ्य संस्थाबाट प्राथमिक स्वास्थ्य केन्द्र थारमारेमा पठाइएको छ ।