काठमाडौं । यस वर्षको 'मिस नेपाल वर्ल्ड २०२५' को उपाधि जित्न सफल लुना लुइँटेलले विदेशमा सिकेको सीप नेपाल फर्किएर उपयोग गर्ने सोचलाई मिस नेपालको ताजले थप उर्जा दिएको बताउनुभएको छ ।
सिड्नी विश्वविद्यालयमा पब्लिक हेल्थमा स्नातकोत्तर अध्ययनरत लुइँटेल शनिबार साँझ २५ प्रतिस्पर्धीलाई पछि पार्दै उपाधि जित्न सफल हुनुभएको हो ।
मिस नेपाल एउटा यस्तो मञ्च हो जसले अघिल्लो दिनसम्म सार्वजनिक पहिचानमा नरहेको व्यक्तिलाई एका-एक चर्चाको शिखरमा पुर्याइदिन्छ । यो पटक पनि त्यहि भएको छ ।
हिजोसम्म सार्वजनिक रूपमा नचिनिनुभएकी २६ वर्षीया लुना लुइँटेल अहिले सामाजिक सञ्जाल देखि व्यक्ति व्यक्तिसम्म परिचित नाम भइरहेको छ । शनिबार द हिडन ट्रेजरले आयोजना गरेको मिस नेपाल वर्ल्ड २०२५ को उपाधि विजेता लुइँटेल हिडन् अर्थात् लुकेको अवस्थाबाट सार्वजनिक ट्रेजर अर्थात् खजानामा परिणत हुनुभएको छ ।
मिस नेपाल वल्डमा भाग लिन नेपाल आउनु भएकी लुईटेल हाल सिड्नी विश्वविद्यालयमा पब्लिक हेल्थमा स्नातकोत्तर अध्ययनरत हुनुहुन्छ । काठमाडौंमा जन्मनु हुर्कनु भएकी उहाँ १७ वर्षको उमेरमा अस्ट्रेलिया जानुभएको हो ।
हाल क्लिनिकल नर्स स्पेसलिस्टका रुपमा कार्यरत उहाँ सर्टिफाइड स्कूबा डाइभरसमेत हो । मिस नेपालको ताज पहिर्याउन उहाँले अध्ययन गरिरहेको विभागको प्रोजेक्ट एडभोकेसी सिक्ने, कमाउने र राष्ट्र निर्माणका लागि नेपाल फर्कने भन्ने उद्देश्यले नै मद्दत गर्यो ।
ब्यूटी पेजेन्ट मिस नेपाल उहाँको पहिलो अनुभव होइन । यसअघि उहाँले सन् २०१५ को मिस टिन नेपालकी पहिलो उपविजेता बन्नुभएको थियो । विदेशमा सिकेको सीपलाई स्वदेशमा उपयोग गर्ने उहाँको सोचमा मिस नेपालको ताजले थप उर्जा दिएको छ ।
लुना लुइँटेलले भनिन्, "१७ वर्षको उमेरमा अस्ट्रेलिया पढ्न जाँदा इमिग्रेसनको भीड देखेर म अचम्मित भएकी थिएँ । त्यतिबेला लाग्यो नेपालमा त को बाँकी होला? तर, बाबामामाले जहिलेदेखि पनि पढेर नेपालमै फर्केर लगानी गर्नुपर्छ भन्नुहुन्थ्यो। अहिले म पनि अभिभावकसँग सकेसम्म धेरै समय बिताउन र आफ्नो स्रोत–साधन प्रयोग गरेर नेपालमै केही गर्न चाहन्छु।"
मिस नेपाल वर्ल्ड २०२४ आश्मा कुमारी केसीले उहाँलाई मिस नेपाल वर्ल्ड २०२५ को ताज पहिर्याइ दिनुभएको थियो ।
