भक्तपुर । चाँगुनारायण नगरपालिकाको आयोजनामा भएको बागमती प्रदेशस्तरीय धिमय् बाजा प्रतियोगिताको उपाधि ताथली धिमय् खलले जितेको छ । नगरपालिकाले आयोजना गरेको उक्त प्रतियोगितामा प्रथम हुने ताथली धिमय् खललाई नगद रु ५० हजार सहित ट्रफी र प्रमाणपत्र प्रदान गरियो ।
प्रतियोगितामा दोस्रो स्थान बैकाभु गणेश सांस्कृतिक खलले हात पार्न सफल भयो । उसले नगद रु २५ हजार सहित प्रमाण पत्र पायो । तेस्रो स्थान भक्तपुरको नियो भिजन बाजा समूह रहँदा चौथो स्थानमा बनेपाको देउला बाँसुरी बाजा खल रह्यो ।
कार्यक्रममा प्रतिनिधि सभा सदस्य दुर्लभ थापाले नगरपालिकाले संस्कृतिलाई उत्थान गर्न आयोजना गरेको प्रतियोगिता सराहनीय भएको बताउनुभयो । उहाँले नगरपालिकालाई पर्यटकीय नगरको रूपमा विकास गर्न यो कोशेढुंगाको रूपमा हुने बताउनुभयो ।
