काठमाडौं । कान्तिपुर टेलिभिजनबाट प्रसारण हुँदै आएको कमेडी च्याम्पियन्स सिजन थ्रीको उपाधि काठमाडौंका सुनील खड्काले जित्नु भएको छ ।
काठमाडौंको मूलपानीस्थित स्टुडियोमा आज साँझ भएको फिनालेमा दर्शकहरूको मतका आधारमा खड्का विजेता घोषित हुनु भएको हो । विजेता खड्काले नेटा भी कार तथा नगद २५ लाख पुरस्कार प्राप्त गर्नु भएको छ ।
यस्तै फस्ट रनर अप सुनसरीका रिसब काफ्ले तथा सेकेन्ड रनर अप नवलपरासीकी सुयशा खनाल हुनु भएको छ । फस्ट रनर अप घोषित हुनु भएका काफ्लेले ट्रफीका साथै स्कुटर, टेलिभिजन तथा नगद पुरस्कार प्राप्त गर्नु भएको छ भने सेकेन्ड रनर अप खनालले स्कुटर र नगद पुरस्कार प्राप्त गर्नु भएको छ ।
चार महिनासम्म चलेको कमेडी च्याम्पियन्सको सिजन थ्रीमा सन्तोष पन्त, मनोज गजुरेल, ऋचा शर्मा र प्रदीप भट्टराई निर्णायक हुनुहुन्थ्यो ।
