काठमाडौं । शुक्रबारबाट प्रदर्शनमा आउने ‘फिल्म गाउँ आएको बाटो’को बुधबार प्रिमियर शो गरिएको छ । काठमाडौं बिजी मलमा गरिएको शोमा फिल्मकर्मी, राजनीतिकर्मी र सामाजिक क्षेत्रमा क्रियाशील व्यक्तिहरूको सहभागिता थियो ।
महेश राईको कथामा नवीन सुब्बाले निर्देशन गरेको ‘गाउँ आएको बाटो’मा कलाकार दयाहाङ राई, पशुपति राई र बाल कलाकार प्रसन राईको मुख्य भूमिका छ । किरात राई समुदायको बस्तीमा उनीहरूको सामाजिक, सांस्कृतिक सम्बन्ध भावनामा आयातित विषयहरूले पारेको प्रभावलाई फिल्ममा देखाइएको छ ।
परम्परागत ज्ञान, सिप र क्षमताहरूलाई सडक आएसँगै कसरी क्रमिक रूपमा अतिक्रमण भइरहेको छ भन्ने विषय फिल्मको मुख्य केन्द्र हो ।
फिल्मको अधिकांश छायाङ्कन पूर्वी पहाडी जिल्ला भोजपुरको दक्षिणी क्षेत्रमा गरिएको छ ।
तस्बिर : श्याम श्रेष्ठ/कान्तिपुर
