काठमाडौं । भारतका विश्वविद्यालयहरुले जनकपुरमा अवैध रुपमा नर्सिङका शैक्षिक कार्यक्रम सञ्चालन गरिरहेको खुलासापछि प्राविधिक शिक्षा तथा व्यावसायिक तालिम परिषद्-सीटीईभीटीले कारबाही प्रकिया अघि बढाएको छ ।
नेपाल नर्सिङ परिषद्को निर्देशनपछि सीटीइभीटीले स्थलगत अनुगमनका लागि जनकपुरमा टोली खटाएको हो । जनकपुरको करिअर केयर कन्सल्टेन्सी नामक संस्थाले एसियन इन्टनेसनल युनिभर्सिटी मणिपुरलगायतका विश्वविद्यालयका लागि अवैध रुपमा नयाँ विद्यार्थी भर्ना र शैक्षिक कार्यक्रम सञ्चालन गरेको भेटिएपछि कारबाही प्रक्रिया अघि बढाइएको हो ।
आइतबार जनकपुरका केही कन्सल्टेन्सीमा अनुगमन गर्दा भारतका विश्वविद्यालयमा विद्यार्थी भर्नाका पहल गरेको स्वीकारेको अनुमगन टोलीलाई उद्दृत गर्दै सीटीइभीटीका सदस्य-सचिव महेश भट्टराईले जानकारी दिनुभयो ।
अनुगमनका लागि सीटीइभीटीका परीक्षा नियन्त्रक उमेश मिश्रको नेतृत्वमा टोली गएको थियो । अनुगमनका क्रममा करिअर केयर कन्सल्टेन्सीले यो शैक्षिक सत्रमा मात्र २२ जना विद्यार्थी भर्नाका लागि पठाएको स्वीकारेको छ ।
सीटीईभीटीले भारतका कुनै पनि विश्वविद्यालयलाई नेपालमा नर्सिङ कार्यक्रम सञ्चालनका लागि अनुमति नदिएको र त्यस्ता संस्थामा विद्यार्थी नपठाउनसमेत सचेत गराएको छ ।
भर्ना र शैक्षिक कार्यक्रम चलाएको पाइए त्यस्तालाई कारवाही गरिने सदस्य-सचिव भट्टराईले बताउनु भयो । अब अनुगमन टोलीले दिने प्रतिवेदनका आधारमा अवैध कार्य गर्ने कन्सल्टेन्सीलाई कारबाही अघि बढाइने सीटीइभीटीले जनाएको छ ।
