काठमाडौं । त्रिभुवन विश्वविद्यालयले वार्षिक प्रणालीतर्फ २०५८ र सेमेस्टरतर्फ २०६९ को सीमा कटेका विद्यार्थीलाई मौका परीक्षाको अवसर दिने भएको छ ।
त्रिवि परीक्षा सुधार समितिका अध्यक्ष एवं शिक्षाध्यक्ष खड्ग केसीको अध्यक्षतामा बसेको बैठकले यस्तो निर्णय गरेको हो ।
बैठकले त्रिविअन्तर्गतका विभिन्न संकाय तथा अध्ययन संस्थानअन्तर्गतका विद्यार्थीको हकमा वार्षिक प्रणालीअन्तर्गत २०५८ देखि र सेमेष्टर प्रणालीअन्तर्गत २०६९ देखिका समयसीमा कटेका परीक्षार्थीलाई एक पटकका लागि मौका परीक्षाको अवसर दिने निर्णय गरेको हो । यसैबीच त्रिविले जुनसुकै तहको परीक्षामा एआईको प्रयोग गरेको पाइए परीक्षा रद्द गर्ने जनाएको छ ।
पछिल्लो समय स्वास्थ्योपचार र प्रविधिको विकासमा एआईको प्रयोग भइरहँदा शिक्षामा यसले पारेको प्रभावबारे बहस भइरहेको छ । एआईले विद्यार्थीको सिकाइलाई प्रत्यक्ष प्रभाव पारेको समेत विज्ञहरूले बताउँदै आएका छन् ।
एआई प्रयोग गरी लेखिएका विषयवस्तुलाई पहिचान तथा निगरानीमा राख्ने प्रणाली बनाए पनि प्रभावकारी भने हुन सकेको छैन ।
