ललितपुर । अङ्ग्रेजी विषयका शिक्षकहरूले सूचना प्रविधिको प्रयोग गरी बालमैत्री ढंगले पठनपाठन गर्न सके सामुदायिक विद्यालयमा अङ्ग्रेजी विषयको शिक्षण सिकाइ प्रभावकारी बनाउन सकिने बताएका छन् ।
नेपाल अङ्ग्रेजी भाषा शिक्षक संघ-नेल्टाले आज ललितपुरमा गरेको अन्तर्राष्ट्रिय सम्मेलनमा सहभागीहरूले अङ्ग्रेजी शिक्षण सिकाइ सुधार्न सूचना प्रविधिको प्रयोगमा जोड दिएका हुन् । शिक्षकहरूले प्राथमिकता दिन नसक्दा सामुदायिक विद्यालयमा अङ्ग्रेजी विषय कमजोर हुने गरेको उनीहरूको भनाइ छ ।
सामुदायिक विद्यालयमा अङ्ग्रेजी बोल्ने वातावरण र विद्यार्थीलाई सरल भाषामा बुझ्न सक्ने गरी पठनपाठन गर्न सके यो विषय पनि सजिलो बनाउन सक्ने विषय शिक्षकहरूको बुझाइ छ ।
'अङ्ग्रेजी भाषा शिक्षणमा पुनर्विचार, समता समावेशिता र नवप्रवर्तन' भन्ने नाराका साथ सुरु भएको अङ्ग्रेजी विषयका शिक्षकहरूको सम्मेलनमा नेपालसहित अमेरिका, बेलायत, कोरिया, जापान, भारत लगायत २० देशका ८ सय शिक्षक सहभागी छन् ।