काठमाडौं । सरकारले ल्याएको विद्यालय शिक्षासम्बन्धी विधेयकको विरोधमा देशभरका शिक्षकहरु सडक आन्दोलनमा उत्रिएका छन् ।
विधेयकका केही प्रावधानमा असन्तुष्टि जनाउँदै शिक्षकहरु काठमाडौं केन्द्रित आन्दोलनमा होमिएका हुन् । नेपाल शिक्षक महासंघको आह्वानमा देशभरका शिक्षकहरुले माइतीघरदेखि नयाँ बानेश्वरसम्म प्रदर्शन गरिरहेका छन् । माइतीघरबाट सुरु भएको जुलुस बबरमहल, बिजुली बजार हुँदै नयाँ बानेश्वर पुगेको छ । शिक्षकहरुले निषेधित क्षेत्रबाहिर नाराबाजी गर्दै प्रदर्शन गरिरहेका छन्।
‘शिक्षक कर्मचारीमाथिको ज्यादती बन्द गर’, ‘शिक्षामा कूल बजेटको २० प्रतिशत लगानी गर’ लगायतका नारा लेखिएका प्लेकार्ड बोकेर शिक्षकहरुले प्रदर्शन गरिरहेका छन् । ठूलो संख्यामा शिक्षकहरु सहभागी प्रदर्शनका कारण अहिले काठमाडौंको ट्राफिक व्यवस्थापन अस्तव्यस्त बनेको छ । विशेष गरी नयाँ बानेश्वर, माइतीघर, त्रिपुरेश्वरलगायतका क्षेत्रको यातायात सेवा प्रभावित भएको छ ।
प्रदर्शनलाई ध्यानमा राख्दै काठमाडौं उपत्यका प्रहरी कार्यालयका प्रवक्ता दिनेशराज मैनालीकाअनुसार सुरक्षा व्यवस्था कडा पारिएको छ । उनले भने, ‘सम्भावित अप्रिय घटनाका लागि हामी तयारी अवस्थामा छौँ ।’
देशभरका ३० हजार सरकारी विद्यालय बन्द गरेर शिक्षकहरु आन्दोलित बनेका हुन् । जसका कारण ७० लाखभन्दा बढी विद्यार्थीको पठनपाठन प्रभावित भएको छ।
सरकारले वार्तामा बस्न पटक–पटक गरेको आग्रहलाई अस्वीकार गर्दै शिक्षकहरूले काठमाडौं केन्द्रित सडक आन्दोलन थालेका हुन् । शिक्षा, विज्ञान तथा प्रविधि मन्त्रालयले (हिजो) मंगलबार ३ बजे सरकारसँग वार्तामा आउन महासंघलाई आग्रह गरेको थियो । तर महासंघले सरकारले बोलाएको वार्तालाई बेवास्ता गर्दै सडक आन्दोलनमा उत्रिएको हो ।
शिक्षक महासंघले विधेयकका दफा ७१ देखि ८८ सम्म राखिएका विभिन्न प्रावधानमा संशोधन गर्नुपर्ने माग गरेको छ । गत भदौ २७ गते सरकारले विद्यालय शिक्षा सम्बन्धी विधेयक प्रतिनिधिसभामा दर्ता गरेको थियो ।
विद्यालय शिक्षासम्बन्धी कानुनलाई संशोधन र एकीकरण गर्न बनेको विधेयकले शिक्षकलाई पालिकामातहत राख्ने व्यवस्था गरेको छ। पालिकामातहत राख्ने प्रावधानप्रति महासंघले असन्तुष्टि जनाउँदै आन्दोलित बनेको हो । महासंघले शिक्षकका पेसागत सुरक्षा, हकहित र सम्मानको माग अघि सारेको छ ।
सम्बन्धित समाचार...
शिक्षा विधेयक २०८० : एसईई खारेजीको प्रस्ताव, शिक्षकलाई राजनीति निषेध (पूर्ण पाठ)
