काठमाडौं । दुईतिहाइ बहुमत नजिकको सरकार गठन भएको एक सय दिन बित्दा पनि निजी क्षेत्रको मनोबल भने उकासिन सकेको छैन ।
सरकारले सम्पत्ति शुद्धीकरणलगायत अन्य अनुसन्धान तीव्र बनाउँदा केही व्यवसायी पक्राउ पर्न थालेपछि निजी क्षेत्र त्रसित बनेको छ । उद्योगी व्यवसायी पक्राउ पर्दा रोजगारीदेखि आर्थिक गतिविधिमै प्रभाव पर्ने भएकाले थुन्नेभन्दा पनि आर्थिक जरिवाना गर्नुपर्ने उनीहरुले माग गरेका छन् ।
बैंकबाट अहिले ६ प्रतिशत हाराहारीमै ऋण पाइन्छ । तर, लिनेहरु नहुँदा बैंकमा १२ खर्बभन्दा बढी रकम थुप्रिएको छ । बहुमत प्राप्त सरकार निर्माण भइसकेको एक सय दिन बित्दा पनि निजी क्षेत्र भने अझै लगानी गर्नका लागि ढुक्क हुन सक्ने अवस्थामा छैन ।
आर्थिक शिथिलता कायमै रहेकाले बजारमा माग सिर्जना नभएकाले बस्तुको बिक्री हुने अवस्था कायमै रहँदा व्यवसायीमा अर्काे त्रास फैलिएको छ । व्यवसायीहरुमा अहिले आफू पनि पक्राउ परिने हो कि भन्ने त्रास देखिन्छ। जसका कारण उनीहरु अहिले लगानी नगरी बस्ने अवस्थामा छन् ।
व्यवसायीहरुले वर्षाैदेखि व्यवसायीलाई आरोपमा लागेमा पहिला थुन्ने भन्दा पनि कुरा सुन्नुपर्ने माग राख्दै आएका छन् । जुन अहिलेसम्म पनि पुरा हुन सकेको छैन । लगानी गरेको व्यवसायी नै थुनिएपछि उसका व्यवसाय समेत प्रभावित हुने गरेका छन् ।
त्यसैले उनीहरुले व्यवसायीलाई थुन्ने भन्दा पनि आर्थिक जरिवाना गर्नुपर्ने बताउँछन् । भटाभट व्यवसायसी निरन्तर पक्राउ पर्दा उनीहरुमा त्रास फैलिएको छ । यस्तो त्रास हटाउनका लागि अब प्रधानमन्त्रीले नै निजी क्षेत्रसँग वार्ता गरेर ढुक्क बनाउनुपर्ने निजी क्षेत्रको भनाइ छ ।
कोरोना महामारी यता ६ वर्षदेखि निजी क्षेत्र एकपछि अर्काे समस्या झेल्दै आएको छ । पछिल्लो समय देखिएको आर्थिक शिथिलताका कारण बस्तुको बिक्री नै नभएको अवस्थामा अहिले सरकारको धरपकडले झनै निराश बनाएको छ । लगानीको वातावरण तयार नहुँदा पछिल्लो समय लगानी पलायन हुने क्रम बढेको व्यवसायी बताउँछन् ।
त्यसैले लगानीकर्तालाई ढुक्क बनाउदै स्थिर नीतिको प्रत्याभूतिको प्रतिक्षामा अहिले निजी क्षेत्र देखिएको छ । नेपालको रोजागारीमा ८५ प्रतिशत हिस्सा निजी क्षेत्रको छ । यो क्षेत्र नै निराश हुने हो भने सरकारले आगामी १० वर्षमा १५ लाख रोजगारी र १ खर्ब भन्दा बढिको अर्थतन्त्र निर्माणसँगै निरन्तर ७ प्रतिशतको आर्थिक वृद्धि सम्भव देखिँदैन ।
सरकारले सुशासनसँगै अब निजी क्षेत्रलाई विश्वस्त बनाउँदै लगानी बढाउनका लागि आश्वस्त पार्न सक्नुपर्छ ।
