सर्लाही । उखु किसानको जायज माग सम्बाेधनका लागि कृषि तथा पशुपन्छी विकास मन्त्री डा. मदनप्रसाद परियारले दुई हप्ताको समय माग गरेपछि आन्दोलन तत्कालका लागि स्थगित गरिएको छ ।
उखु किसानले गत वर्षको बाँकी अनुदान रकममध्ये प्रतिक्विन्टल ३५ र"पैयाँ भुक्तानी गर्न र यस वर्षको क्रसिङ सिजनका लागि उखुको न्यूनमत समर्थन मुल्य प्रतिक्विन्टल ७५० र"पैयाँ निर्धारण गर्न माग गर्दै मंसिर ९ गते कृषिमन्त्री परियारलाई भेटेर ज्ञापन पत्र बुझाएका थिए ।
ज्ञापनपत्र बुझाएपछि पनि उखु किसान र मन्त्री परियारबीच बक्यौता अनुदान रकम भुक्तानी र उखुको मूल्य कायम गर्ने विषयमा छलफल भएको थियो । सो क्रममा मन्त्री परियारले आफूहरूको माग सम्बाेधन गर्नका लागि दुई हप्ता समय माग गरेकाले आइतबारदेखि गर्ने भनिएको आन्दोलन तत्कालका लागि स्थगित गरिएको नेपाल उखु उत्पादक महासंघका अध्यक्ष श्यामबाबु रायले जानकारी दिनुभयाे ।
१३ गतेसम्म माग पुरा नभए उखु किसानले १४ गतेदेखि सर्लाहीको हरिवनमा अनिश्चितकालिन रूपमा पूर्वपश्चिम राजमार्गमा चक्काजाम गर्ने कार्यक्रम थियो । सरकारले गत वर्ष उखु किसानलाई अनुदानबापत प्रतिक्विन्टल ७० रूपैयाँ भुक्तानी गर्ने निर्णय गरी ३५ रूपैयाँका दरले मात्रै पैसा पठाएपछि किसान असन्तुष्ट छन् ।
अझ यो वर्षदेखि उखुको अनुदान रकमका लागि बजेट नै विनियोजन नभएपछि किसान थप आक्रोशित छन् ।
