काठमाडौं । गैरआवासीय नेपाली संघ-एनआरएनए एकताबद्ध हुने भएको छ ।
एनआरएनएका अध्यक्ष बद्री केसीले एनआरएनए विभाजित नभइ एकताबद्ध भएर अघि बढ्ने सहमति भएको बताउनुभयो । एनआरएनए स्थापनाको २२औं वार्षिकोत्सवका अवसरका काठमाडौंमा आयोजित कार्यक्रममा अध्यक्ष केसीले तीन महिनाभित्र विशेष अधिवेशन गर्ने गरी सबै पक्षसँग सकारात्मक छलफल भएको जानकारी दिनुभयो ।
उहाँले असन्तुष्ट पक्षले अदालतमा दिएका मुद्दा फिर्ता गर्ने र एक-दुई दिनभित्रै परराष्ट्र मन्त्रालयका प्रतिनिधिको रोहवरमा एकता घोषणा गरिने दाबी गर्नुभयो । २०८० साल कात्तिकमा भएको एनआरएनएको निर्वाचनबाट अध्यक्षमा केसी निर्वाचित हुनुभएको थियो ।
प्रतिस्पर्धीहरू आरके शर्मा र महेश श्रेष्ठको समूहले निर्वाचनको निष्पक्षतामाथि प्रश्न उठाउँदै अलग समूह गठन गरेका थिए ।
