काठमाडौं । उखु किसान सडकमा छन् । अब फेरि दुग्ध किसानसमेत रकम भुक्तानीको माग गर्दै सडकमै ओर्लिएका छन् ।
चार महिनासम्म सरकारले रकम भुक्तानी नगरेको भन्दै किसानहरूले आइतबार लैनचौरस्थित दुग्ध विकास संस्थानअगाडि धर्ना दिएका छन् । सरकारले कृषि क्षेत्रलाई प्राथमिकता दिएको दाबी गरिरहेका बेला उखु किसानदेखि दुग्ध उत्पादक किसानसम्म आन्दोलनमा उत्रन बाध्य भइरहेका छन् ।
लैनचौरस्थित दुग्ध विकास संस्थान-डीडीसीअगाडी धर्ना दिन पुगेका किसानहरूको एउटै माग छ-किसानले बिक्री गरेको दूधको भुक्तानी समयमै होस् । चार महिनादेखि झुलाएर मर्कामा पार्ने काम भएको उनीहरूको गुनासो छ ।
संघीय कृषि तथा पशुपन्छी विकास मन्त्रालयका अनुसार डीडीसीले चार महिनादेखि ८२ करोड रूपैयाँभन्दा बढी भुक्तानी गर्न बाँकी छ । कृषि मन्त्रालय भने तीजयता दूधको बिक्री बढेकाले विस्तारै भुक्तानी हुने बताउँछ ।
सरकारी स्वामित्वको दुग्ध विकास संस्थानले असार अघिसम्म बजारमा चाहिनेभन्दा बढी दूध आएको हुँदा भुक्तानीमा समस्या हुँदै आएको जनाएको थियो । अहिले डीडीसीले ७ सय टन धुलो दूध गोदाममै थन्किएको बताएको छ ।
मौज्दात रहेको धूलो दूध र बटर जापानलगायतका मुलुकमा निकासीको प्रयास भए पनि सफल हुन सकेको छैन । हालैमात्रै उच्चस्तरीय चिनियाँ टोलीलाई पनि सरकारले दुग्ध पदार्थ लैजान आग्रह गरेको छ ।
डीडीसीले जस्तै निजी डेरीले पनि किसानबाट खरिद गरेको दूधको भुक्तानी दिन आलटाल गरेका छन् । निजी क्षेत्रको २ अर्बभन्दा बढी भुक्तानी गर्न बाँकी छ । कृषि मन्त्रालयले किसानको भुक्तानी तत्काल गर्न आग्रह गरे पनि उद्योगीहरूले टेरेका छैनन् ।
