काठमाडौं । नेपाल एपीएफ क्लब, जितविहीन रहँदै एएफसी महिला च्याम्पियन्स लिगको प्रारम्भिक चरणबाटै बाहिरिएको छ ।
समूह 'बी' अन्तर्गत आइतबार सम्पन्न आफ्नो अन्तिम खेलमा विभागीय टोली एपीएफ साउदी अरेबियाको अल नासारसँग ६-१ ले पराजित भएको हो ।
उज्बेकिस्तानको क्वार्सीस्थित मार्काजिय स्टेडियममा खेलको चौंथो मिनेटमा क्लारा लुभान्गाले गोल गर्दै मध्यपूर्वी टोलीलाई सुरुवाती अग्रता दिलाएकी थिइन् । ४१औं मिनेटमा ब्राजिलियन खेलाडी डुडा फ्रान्सेलिनोले नासारको अग्रता दोब्बर पारिन् ।
५०औं मिनेटमा सविता रानाले लामो दुरीबाट गरेको प्रहारले जाली चुमेपछि एपीएफले पुनरागमनको प्रयास गरेको थियो । सविता नेपाली क्लबका लागि महिला च्याम्पियन्स लिगको प्रारम्भिक चरणमा गोल गर्ने पहिलो खेलाडी बनिन् । यसअघि रेखा पौडेलले अबुधावी कन्ट्री क्लबका लागि मुख्य ड्रमै गोल गरिसकेकी छन् ।
६२औं मिनेटमा लुभान्गाले व्यक्तिगत दोस्रो गोल गर्दै नासारलाई बलियो अवस्थामा पुर्याइन् । ७०औं मिनेटमा साउदी टोलीले फ्रि किकमार्फत् चौथो गोल थप्यो । त्यस पछी पनी उसले थप २ गाेल गरेपछि ६-१ को फराकिलो जित हात पार्यो ।
यससँगै चेतन घिमिरेको टोली लगातार दोस्रो सिजन जितबिहीन हुँदै प्रतियोगिताबाट बाहिरिएको छ । एपीएफ पहिलो खेलमा पीएफसी नासाफसँग ३-० तथा दोस्रो खेलमा थाइल्यान्डको कलेज अफ एसियन स्कोलार्ससँग ५-० ले पराजित भएको थियो ।
नासार सुरुवाती २ खेलमा स्कोलार्स र पीएफसी नासाफसँग पराजित भएको थियो । यसअघि नै प्रतियोगिताबाट बाहिरिइसकेको साउदी टोलीले सान्त्वना जितसहित प्रतियोगिता समाप्त गरेको हो ।
