काठमाडौं । विदेश पढ्न तथा घुम्न जानेहरू उल्लेख्य रूपमा बढ्दै जाँदा सरकारको सेवा खाता ९० अर्ब ९४ करोड रूपैयाँले घाटामा गएको छ ।
आर्थिक वर्ष २०८०/०८१ को तुलनामा २०८१/०८२ मा सेवा खाता ३५ अर्बभन्दा धेरैले घाटामा गएको हो । विदेशमा काम गर्न, घुम्न र पढ्न जानेको तुलनामा नेपालमा घुम्न आउने पर्यटकले गर्ने खर्च कम हुँदा सेवा खाता घाटामा गएको हो ।
राष्ट्र बैंकको पछिल्लो तथ्यांकअनुसार आर्थिक वर्ष २०८०/८१ मा सेवा खाता ५५ अर्ब ८६ करोडले घाटामा गएको थियो । तर भ्रमण व्यय १८ दशमलव १ प्रतिशतले बढ्दा सेवा खाता घाटामा जाने क्रम बढ्दै गएको हो ।
२० वर्षदेखि यस्तो खाता बर्सेनि घाटामा छ । विदेशमा पढ्न जानेहरूबाट आर्थिक वर्ष २०८१/८२ मा २ खर्ब २३ अर्ब बाहिरिएको छ । जबकी यस्तो खर्च २०८०/०८१ मा १ खर्ब २५ अर्ब थियो ।
विदेश घुम्न जानेहरूबाट ८५ अर्ब बाहिरिएको छ । जुन अघिल्लो आर्थिक वर्ष २०८०/०८१ मा ६४ अर्ब थियो । पर्यटकबाट भएको आय भने ८८ अर्ब मात्रै छ । घुम्न गएकाहरूबाट लाभ लिन नसके पनि पढ्न गएकाहरूबाट भने सरकारले रेमिट्यान्स प्राप्त गर्ने गरेको छ ।
भ्रमण व्यय १८ प्रतिशतले बढ्दा रेमिट्यान्स १९ प्रतिशतले बढेर १७ खर्ब २३ अर्ब प्राप्त भएको छ । पढ्न गएकाहरूबाट रेमिट्यान्ससँगै भविष्यमा ज्ञान पनि नेपालमा भित्रने हुँदा यसमा भएको खर्चलाई मानव पुँजी निर्माणमा भएको खर्चको रूपमा लिने गरिएको छ । तर, यस्तो खाता बचतमै राख्न सरकारले जसरी पर्यटक भित्र्याउनुपर्थ्यो, त्यसमा भने चुकिरहेको देखिन्छ ।
