राप्ती एफसीकाे मुख्य ड्रमा छनोट हुने सम्भावना जिवितै

भाद्र १५, २०८२ |खेल ब्युरो
राप्ती एफसीकाे मुख्य ड्रमा छनोट हुने सम्भावना जिवितै

काठमाडौं । एन्फा महिला लिगमा लगातार दोस्रो जित हात पारेको राप्ती एफसीले मुख्य ड्रमा छनोट हुने सम्भावनालाई जिवित राखेको छ । 

आइतबार सम्पन्न खेलमा राप्ती एफसीले स्टुडेन्ट्स फुटबल क्लबलाई ८-० को फराकिलो गोल अन्तरले हराएको हो । च्यासल मैदानमा राप्तीलाई जित दिलाउन रेबिका नेपालीले हृयाट्रीक गरिन् । 

पहिलो हाफमा रेबीकाले दुई गोल गरिन् । ३३औँ मिनेटमा मेनुका मगरले गोल गरेपछि मध्यान्तरसम्म राप्तीले ३-० को अग्रता बनाएको थियो। दोस्रो हाफमा झन आक्रमक बनेको राप्तीले थप ५ गोल गर्यो । 

खेलको ५६औँ र ८०औँ मिनेटमा डीना नेपालीले गोल गरिन । ८४औँ मिनेटमा रेबीका नेपालीले हृयाट्रीक पुरा गर्दा ९०औँ मिनेटमा माया मास्केले गोल गरिन । इन्जुरी समयमा मन्ज डोङले गोल गर्दै राप्तीलाई ८-० को सानदार जित दिलाइन् । 

जितसँगै राप्तीले ५ खेलमा १० अंक जोडेको छ । उ समूह 'बी'को दोस्रो स्थानमा छ । १४ टोली सहभागी छनोट प्रतियोगिताबाट पाँच टोलीले मुख्य लिगमा स्थान बनाउने छन् । स्टुडेन्ट्स एफसीको भने छनोट हुने सम्भावना समाप्त भएको छ ।

आजै सम्पन्न अर्को खेलमा झापा एफसीले बुटवल लुम्बीनी एफसीलाई २-१ ले हराएको छ ।