साफ यू-१७ महिला च्याम्पियनसिप : नेपाल र भुटानबीचकाे खेल बराबरीमा

भाद्र १५, २०८२ |खेल ब्युरो
साफ यू-१७ महिला च्याम्पियनसिप : नेपाल र भुटानबीचकाे खेल बराबरीमा

काठमाडौं । नेपालले घरेलु टोली भुटानसँग बराबरी खेल्दै साफ यू-१७ महिला च्याम्पियनसिप समाप्त गरेको छ । 

प्रतियोगिताको अन्तिम खेलमा नेपालले आयोजक भुटानसँग १-१ गोलको बराबरी खेल्दै अंक बाँडेको हो । यससँगै नेपालले तेस्रो स्थानमा रहेर भुटान भ्रमण टुङ्ग्याएको छ । भुटान प्रतियोगिताको पुछारमा रह्यो ।

 भुटानविरूद्ध नेपालले पहिलो भेटमा २-१ को जित दर्ता गरेको थियो । 

थिम्पुस्थित चाङ्लिमिथाङ रंगशालामा खेलको १५औं मिनेटमा बब्टिका कार्कीको गोलमार्फत् नेपालले सुरूवाती अग्रता बनाएको थियो । पहिलो हाफ सकिनु ठिक अघि सोनाम याङचेनले घरेलु टोलीका लागि बराबरी गोल फर्काइन् ।

दोस्रो हाफमा दुबै पक्षबाट थप गोल हुन सकेन । ६ खेलमा जम्मा १ जित हात पारेको नेपालले ४ अंकसहित तेस्रो स्थानमा रहेर प्रतियोगिता समाप्त गरेको हो । भारतविरुद्ध ७-० र ५-० ले पराजित भएको नेपाल बंगलादेशसँग पनि ३-० र ४-१ ले पराजित हुन पुगेको थियो ।

आजै सम्पन्न खेलमा बंगलादेशले प्रतियोगिताको च्याम्पियन भारतलाई ४-३ ले स्तब्ध पारेको थियो । भारत एक खेल अगावै च्याम्पियन बनिसकेको थियो । उसले ६ खेलमा १५ अंक जोडेर उपाधि हात पार्दा बंगलादेश १३ अंकसहित दोस्रो स्थानमा रहृयो ।