काठमाडौं । नेपालको पर्यटनको मुख्य स्रोत भारत र चीनलाई मानिँदै आएको छ । तर सन् २०२५ सुरु भए यता भने यी दुई देशबाट आउने पर्यटकको संख्या लगातार घटेको छ ।
फेब्रुअरीमा भारतबाट आउने पर्यटक २५ प्रतिशतले घटेकोमा मार्चमा ३० प्रतिशतले कमी आएको छ भने चीनबाट आउने पर्यटकको संख्या पनि ओरालो लागेको छ ।
सन् २०१९ को मार्चमा चीनबाट आउने पर्यटकको संख्या १७ हजार ३ सय थियो । तर सन् २०२५ मा आईपुग्दा यो संख्या घटेर ११ हजारमा झरेको छ । कोभिडअघि भारत र चीनबाट आउने पर्यटकको संख्या उस्तै थियो ।
तर कोभिडपछि भने भारतीय पर्यटक पुरानै अवस्थामा फर्के पनि चिनियाँ पर्यटक बढ्न सकेका छैनन् । त्यस्तै सन् २०२४ मा भारतबाट आउने पर्यटकको संख्या ३० हजार थियो तर सन् २०२५ मा ३० प्रतिशतले घटेर २१ हजार ४ सयमा सीमित भएका छन् ।
पर्यटन बोर्डले सार्वजनिक गरेको तथ्यांकअनुसार सन् २०२५ को मार्चमा ३० देशबाट आउने पर्यटक घटेका छन् । ५ महिनादेखि १० घण्टा बन्द भएको त्रिभुवन अन्तर्राष्ट्रिय विमानस्थल मंगलबारदेखि १८ घण्टा सञ्चालनमा आएपछि भने पर्यटक आगमन बढ्ने अपेक्षामा व्यवसायी छन् ।
सन् २०२४ को मार्चमा १ लाख २८ हजार पर्यटक नेपालमा भित्रिएकोमा यस वर्ष झन्डै ७ हजारले घटेर १ लाख २१ हजार मात्र भित्रिएका छन् । दक्षिण एसियाली देशमध्ये भारतबाट आउने पर्यटक घटे पनि श्रीलंका, बंगलादेश र भुटानबाट आउनेको संख्या भने केही बढेको छ ।
दक्षिण एसियाबाट आउने पर्यटकको संख्या १३ प्रतिशतले घट्दा युरोपबाट आउने पर्यटको संख्या १० प्रतिशतले कमी आएको छ ।
