काठमाडौं । सरकारले आन्तरिक रोजगार दशक घोषणा गरेको छ । आन्तरिक रोजगारी अभिवृद्धि गर्न श्रम, रोजगार तथा सामाजिक सुरक्षा मन्त्रालयले गरेको 'राष्ट्रिय श्रम तथा रोजगार सम्मेलन'मा प्रधानमन्त्री केपी शर्मा ओलीले अबको १० वर्षलाई आन्तरिक रोजगार दशक घोषणा गर्नुभएको हो ।
सम्मेलनमा श्रम, रोजगार तथा सामाजिक सुरक्षामन्त्री शरतसिंह भण्डारीले प्रत्येक वर्ष श्रम बजारमा आउने श्रम शक्तिलाई स्वदेशमै रोजगारीका अवसर सिर्जना गरिने बताउनुभयो । उद्योग वाणिज्य महासंघका अध्यक्ष चन्द्रप्रसाद ढकालले निजी क्षेत्रलाई निरुत्साहित गर्ने खालका नीतिगत अस्पष्टता हटाउन सुझाव दिनुभयो ।
सम्मेलनमा विज्ञ तथा व्यवसायीहरूले आन्तरिक रोजगारीको वृद्धिका लागि नेपालमा सार्वजनिक, निजी र बाह्य लगानी बढाउन आवश्यक रहेको बताए । उनीहरूले बजारको माग अनुसारको सीप दिलाउने शिक्षा प्रणाली ल्याउन समेत सरकारलाई सुझाए ।
त्यस्तै कार्यक्रमका अन्य विज्ञहरूले आन्तरिक रोजगार प्रवर्द्धनका लागि सीप विकासलाई मुख्य प्राथमिकतामा राख्न सरकारलाई सुझाव दिए ।
उत्पादन र उत्पादकत्व विस्तार, आन्तरिक रोजगारीको दिगो आधार भन्ने मुख्य नारा सहित सुरु भएको सम्मेलन भोलिसम्म चल्ने छ । सम्मेलनले आन्तरिक रोजगारको ठोस खाका बनाउने श्रम, रोजगार तथा सामाजिक सुरक्षा मन्त्रालयले जनाएको छ ।
