झापा । चाडपर्व नजिकिएसँगै झापाका किसानले राम्रो भाउ पाउने आशामा केरा काट्न शुरु गरेका छन् । झापामा उत्पादित केरा राजधानी काठमाडौंसँगै जनकपुर, विराटनगर, धरानलगायतका शहरमा खपत हुने गर्छ ।
कन्काई क्षेत्रका किसानले धमाधम केरा काटेर बजारमा पठाउन थालेका हुन् । प्रति विघा कम्तीमा १२ सय घरी केरा उत्पादन हुन्छ । घरीको ६ सय रुपैयाँको दरले विघामा सातलाख रुपैयाँ आम्दानी हुने किसान बताउँछन् ।
भारतबाट सस्तोमा आयात हुने केराका कारण नेपाली उत्पादनलाई प्रतिस्पर्धा गर्न भने कठिन छ । तर विषादीको मात्रा बढी हुने आशंकामा उपभोक्ताले केही महंगो भए पनि स्थानीय उत्पादन रोज्ने हुनाले माग बढेको व्यापारी बताउँछन् ।
झापामा १९ सय हेक्टरमा केराखेती हुने गर्दछ । जसबाट वार्षिक ३८ हजार ४ सय मेट्रिक टन उत्पादन हुने कृषि ज्ञान केन्द्र झापाले जनाएको छ ।
