जनकपुर । भारतबाट आलु-प्याज आयात गर्दा सरकारले भ्याट लगाएका कारण व्यापारीले आयात बन्द गर्दा जनकपुर क्षेत्रमा आलु-प्याज अभाव भएको छ ।
८५ प्रतिशत आलुप्याज भारतबाट आयात हुने जनकपुर क्षेत्रको बजारमा व्यापारीहरूले आयात रोक्दा चर्को अभाव भएको जनकपुरका शुभकरण झा बताउँछन् । गोदाम र पसलहरूमा आलु र प्याजको बिक्री बन्द गरिएको छ ।
सरकारले आगामी आर्थिक वर्ष ०८०/८१ का लागि पेस गरेको वार्षिक बजेटमा कृषिजन्यवस्तुमा कायम रही आएका करका अतिरिक्त १३ प्रतिशत भ्याट थपेपपछि जनकपुरका व्यापारीहरू हिजोदेखि पसल बन्द गरेर आन्दोलित भएको जनकपुरका व्यवसायी अलाउद्दिन राइनको भनाइ छ ।
व्यापारीहरु आन्दोलित भएपछि भारतबाट तस्करी भएर आउने आलु-प्याजको मूल्य आकासिएको छ ।
