जुरिच । अमेरिकाको सिलिकन भ्याली बैंक बन्द भएको एकसाता नबित्दै स्विट्जरल्यान्डको बैंक क्रेडिट स्विसमा संकट देखापरेको छ ।
तरलता अभावको सामना गर्न यसले स्विस सेन्ट्रल बैंकबाट ५४ अर्ब डलर ऋण लिने जनाएको छ । स्विस नेसनल बैंक र स्विस फाइनान्सियल मार्केट सुपरभाइजरी अथोरिटीले सहयोग गर्न तयार रहेको भन्दै लगानीकर्ताको भय शान्त पार्ने प्रयास गरेका छन् । तर अमेरिकी बैंकिङ क्षेत्रमा देखापरेको हलचलले स्विस संस्थाहरुमा प्रत्यक्ष असर पार्ने संकेत नदेखिएको उनीहरुको दाबी छ ।
बैंक अफ इंग्ल्यान्डले सहयोगका लागि स्विस अधिकारी र क्रेडिट स्विस बैंकसँग सम्पर्कमा रहेको जनाएको छ । अमेरिकी बैंकको असफलताले डराएका लगानीकर्ता क्रेडिट स्विस बैंकको अवस्थाबाट सम्भावित संकटप्रति चिन्तित भएको अन्तर्राष्ट्रिय सञ्चारमाध्यमले टिप्पणी गरेका छन् । क्रेडिड स्विस बैंकले आफनो आर्थिक प्रतिवेदनमा कमजोरी फेला पारेको जनाएपछि बुधबार सेयर मूल्य २४ प्रतिशतले तल झरेको थियो । यसको असर विश्वका अन्य सेयर मार्केटमा समेत देखिएको थियो ।
सन् १८५६ मा स्थापना भएको क्रेडिट स्विस ज्युरिचमा मुख्यालय रहेको अन्तर्राष्ट्रिय लगानी तथा वित्तिय सेवा प्रदायक कम्पनी हो । विश्वका करिब ५० देशमा एक सय ५० भन्दा बढी कार्यालय छन् ।