काठमाडौं । पत्रकार तथा लेखक रोहित भण्डारीको तेस्रो कृति ‘दिए पुग्छ’ लोकार्पण भएको छ । प्रज्ञा भवन कमलादीमा एक कार्यक्रमका बीच शुक्रबार प्रतिनिधि सभाकी उपसभामुख इन्दिरा राना मगर, प्रेस काउन्सिल नेपालका अध्यक्ष बालकृष्ण बस्नेत, लेखक रोहित भण्डारी लगायतले पुस्तक लोकार्पण गर्नुभएको हो ।
कार्यक्रमका विशेष अतिथि तथा प्रतिनिधि सभाकी उपसभामुख इन्दिरा राना मगरले प्रेरणादायी पुस्तक लेखकका रूपमा पहिचान बनाएका भण्डारीको ‘दिए पुग्छ’ पुस्तकले परोपकारी समाज निर्माणमा महत्त्वपूर्ण सहयोग पुग्ने बताउनुभयो । उहाँले भन्नुभयो, “नेपाललाई चिनाउने भनेकै कथाले हो । यस्ता सकारात्मक र वास्तविक जीवनका कथाले समाजमा सकारात्मक परिवर्तन ल्याउन सहयोग पुग्छ ।”
उहाँले विदेशीले नेपाल आउँदा यहाँको प्रकृतिसँगै मानिसहरू पनि राम्रो र मन सफा रहेको बताउने गरेको उल्लेख गर्नुभयो ।
कार्यक्रममा बोल्दै प्रेस काउन्सिल नेपालका अध्यक्ष बालकृष्ण बस्नेतले यस्ता खालका पुस्तकले नेपालमा परिवर्तन ल्याउन सहयोग पुग्ने बताउनुभयो ।
पुस्तकको समीक्षा गर्दै साहित्यकार बलराम दाहालले पत्रकार रोहित भण्डारीको लेखन शैलीबाट आफू प्रभावित भएको बताउनुभयो । वास्तविक पात्रहरूका प्रेरणादायी कथालाई मार्मिक ढङ्गले प्रस्तुत गरेको पुस्तक ‘दिए पुग्छ’ पढ्दै जाँदा आफू धेरै पटक भक्कानिएको उहाँले बताउनुभयो ।
यस्तै पुस्तकका लेखक रोहित भण्डारी पुस्तक लोकार्पण कार्यक्रममा आमाको आर्शीवाद नपाउँदा भावुक हुनुभयो । उहाँले भन्नुभयो, “मैले यो पुस्तकका पात्रहरूको कथा आमालाई सबै सुनाएको थिएँ । तर जब मैले यो पुस्तक लेखेर सकें, आमा मेरो साथमा हुनुहुन्न । तपाईंहरूले पुस्तक पढ्दै गर्दा मेरी आमालाई पनि अन्तरआत्माले सम्झिदिनुहोला ।”
भण्डारीले यसअघि ‘सम्भव छ’ र ‘नेपालमै सकिन्छ’ गरी दुई पुस्तकहरू प्रकाशित गरिसक्नुभएको छ ।
