काठमाडौं । सांसदहरूले भारत र पाकिस्तानबीच जारी तनावले नेपालमा पर्न सक्ने प्रभावपछिको तयारीबारे सरकारसँग जानकारी माग गरेका छन् । प्रतिनिधि सभाको आज बसेको बैठकमा सांसदहरूले छिमेकी दुई मुलुकबीचको तवावले नेपालमा पर्ने प्रभावपछिको तयारीबारे सरकारसँग जानकारी माग गरेका हुन् ।
उनीहरूले भारत र पाकिस्तानबीचको तनावले नेपालको आपूर्ति लगायतका क्षेत्रमा प्रभाव पर्न सक्ने बताए । त्यसका लागि सरकारले कुनै तयारी गरेको छ कि छैन भन्ने प्रश्न गर्दै संसद्लाई जानकारी दिन माग गरे ।
बैठकमा सांसदहरूले भारत र पाकिस्तानमा रहेका नेपालीको जोखिम बढेको भन्दै उनीहरूको सुरक्षामा चासो दिन सरकारको ध्यानाकर्षण गराए । यस्तै खुला सीमा लगायतका कारण नेपालको सुरक्षाको विषयमा हुन सक्ने जोखिमलाई पनि सरकारले ख्याल गर्नुपर्ने उनीहरूको भनाइ छ ।
यसैगरी प्रतिनिधि सभामा आज पनि सरकारको नीति तथा कार्यक्रममाथि छलफल जारी छ ।
