काठमाडौं । निबन्धकार श्रीओम श्रेष्ठ'रोदन'द्धारा लिखित व्यक्ति निबन्धसंग्रह ‘अभिवन्द्य’को तेस्रो प्रकाशन सार्वजनिक भएको छ ।
सुनकोसी वाङ्मय प्रतिष्ठानको आयोजनामा सोमबार राजधानीमा भएको एक कार्यक्रममा प्रा.डा.लक्ष्मणप्रसाद गौतम,समालोचक प्रमोद प्रधान,निबन्धकार 'रोदन'लगायतले उक्त निबन्धसंग्रहलाई सार्वजनिक गर्नुभएको हो ।
कार्यक्रममा उक्त कृतिमाथि समालोचनात्मक मन्तव्य राख्दै प्रा.डा.तथा वरिष्ठ समालोचक गौतमले भन्नुभयो- 'पुस्तक पढ्नु भन्दा मान्छेलाई पढ्न कठीन छ । यो दुस्साहस श्रीओम श्रेष्ठ रोदनले गरेका छन् । अभिवन्द्य मान्छे पढेर निस्केको निबन्ध कृति हो । भन्न सकिन्छ नयाँ शैलीको लगभग श्रेष्ठले आविस्कार गरेका छन्।'
क्रियाविना वाक्यको प्रयोगले पनि निबन्ध राम्रा छन् भन्दै उनले नेपाली निबन्ध साहित्यमा यो शैलीको विकास अभिवन्द्यले प्रयोग गरेको बताउनु भयो । रोदनले धेरै स्रष्टाहरुको अनुद्घाटित तथ्यलाई निबन्ध मार्फत बाहिर ल्याएको पनि प्रा.डा.गौतमले बताउनु भयो ।
शुभकामना मन्तब्य दिंदै समालोचक प्रधानले सरल भाषाशैलीमा मीठो ढंगले आएका निबन्धहरुले सबै पाठकको माया पाउने बताउनु भयो । उहाँले आफ्नो बारेमा पनि उक्त कृतिमा एउटा निबन्ध परेको बताउँदै सोही कृति सार्वजनिक गर्न पाउँनु सुखद भएको भन्दै सफलताको निम्ति शुभकामना दिनुभयो ।
अभिवन्द्यका स्रष्टा श्रीओम श्रेष्ठ'रोदन'ले कृतिको रचनागर्भको बारेमा जानकारी दिनुभयो । उहाँले भन्नुभयो -'भोली के हुन्छ भनेर भन्न सक्दिन्।शालिक र स्मृतिग्रन्थप्रति उतिसाह्रो विश्वास पनि छैन् ।त्यसैले जिउँदै सम्मान गर्ने र सम्मानग्रन्थ निकाल्नु पर्दछ।'आफुले आजसम्म संगत गरेका मान्छे खराव नभएको चर्चा गर्दै उनले जीवनमा आफ्नो कमाई भनेकै साथीभाइ भएको बताउनु भयो ।
राममणि रिसालको निबन्ध पढेर त्यसको उत्प्रेरणाले निबन्ध लेखनमा लागेको बताउँदै उहाँले लेखनीमा तेजेश्वर बाबु ग्वँगको केही प्रभाव परेको बताउनु भयो ।
अर्का वक्ता समीक्षक प्रदीप सापकोटाले विभिन्न क्षेत्रका व्यक्तित्वहरुको सामिप्यता,उठबस,भोगाइ,सरसंगत,सहकार्य,यात्रा र उनीहरुका योगदानलाई निजात्मक अनुभूतिको चास्नीमा मज्जैले घोलेर लेखिएका व्यक्ति निबन्धहरु पठनीय भएको बताउनु भयो । अभिवन्द्यले परम्परावादी निबन्धकारिता तोडेको पनि उहाँले बताउनु भयो । निबन्धले आफु मज्जैले तानिएको बताउँदै उहाँले निबन्धसंग्रह जानकारीमूलक पनि रहेको बताउनु भयो ।
प्रतिष्ठानका अध्यक्ष छविरमण सिलवालले संस्थाको बारेमा जानकारी दिंदै केही गरौं भन्ने भावनाले प्रतिष्ठानको स्थापना गरिएको बताउनु भयो । प्रतिष्ठानका कोषाध्यक्ष तारा केसीले स्वागत गरेको उक्त कार्यक्रमको सञ्चालन कवि एवं वरिष्ठ सञ्चारकर्मी ठाकुर बेलवासेले गर्नुभएको थियो । कार्यक्रममा उपस्थित सबैलाई सदस्य पूर्णबहादुर श्रेष्ठ'ह्रदयङकृत'ले धन्यवाद ज्ञापन गर्नुभयो ।
