काठमाडौं । लेखक भीमलाल सापकोटाको उपन्यास ‘धरौट’ शनिबार काठमाडौंमा एक कार्यक्रमका बीच सार्वजनिक भएको छ ।
कार्यक्रमका प्रमुख अतिथि साहित्यकार श्यामलले किताबले १० वर्षे द्वन्द्वको कथा उजागर गरेको बताउनु भयो । ‘किताबले द्वन्द्वको घाउ बोलेको छ’, उहाँले भन्नुभयो, ‘मान्छेहरूको उसबेलाको तनाव किताबको विषय बनेको छ ।’
यसैगरि साहित्यकार भारती न्यौपानेले लेखक सापकोटाको पहिलो उपन्यास भएपनि निकै खारिएको बताउनु भयो । लेखक तथा पत्रकार श्रीश भण्डारीले सापकोटाको धरौटले पश्चिम नेपालको पृष्ठभूमीमा नेपाली जनजनको कथालाई बोलेको बताउनु भयो । बाल साहित्यकार तथा इटर्नल पब्लिकेसन्सका प्रबन्ध निर्देशक यमुना पराजुलीको सभापतित्वमा संचालन भएको उक्त कार्यक्रममा कवि असीम सागरले लेखक भीमलाल सापकोटाको प्रेमिल परिचय गराउनु भएको थियो ।
उपन्यासमा तत्कालिन दशबर्षे ‘जनयुद्व’ को त्रासद वर्णन र बाहिर नआएका कतिपय वैदेशिक रोजगारका भित्री कथाहरू छन् । १६८ पुष्ठ रहेको उपन्यासलाई इटर्नल पब्लिकेशनले प्रकाशन गरेको हो ।
