काठमाडौं । एसियाली फुटबल महासंघ-एएफसीले अखिल नेपाल फुटबल संघ-एन्फालाई कारबाही गर्दै १० हजार अमेरिकी डलर जरिवाना गरेको छ ।
एएफसीको अनुशासन र आचारसंहिता कमिटीले नेपाललाई कारबाही गर्ने निर्णय गरेको हो । नेपालले एएफसी फुटसल कप २०२६ को छनोटमा भाग नलिएपछि यो कारबाही गरिएको हो ।
कमिटीका अनुसार एन्फाले छनोटका खेल सुरू हुन १ सय ६ दिन अगाडि नाम फिर्ता लिएको थियो । एन्फालाई प्रतियोगिताको नियमावलीअनुसार कारबाही गरिएको हो । एन्फाले प्रक्रियागत त्रुटिका कारण जरिवाना बेहोर्नुपरेको बताएको छ ।
कारबाही अनुसार नेपालले यो सूचना प्राप्त गरेको ३० दिनभित्र रकम बुझाउनु पर्नेछ । नेपालले प्रतियोगिताको अर्को संस्करणमा पनि भाग लिन पाउने छैन ।
