काठमाडौं । ताजिकिस्तानमा हुने एएफसी यू-२३ एसियन कप क्वालिफायरका लागि नेपाली टोली घोषणा भएको छ।
अखिल नेपाल फुटबल संघ-एन्फाले आगामी भदौ १८ गतेदेखि २४ गतेसम्म हुने छनोटका लागि नेपाली टोली घोषणा गरेको हो ।
घोषित २३ सदस्यीय टोलीमा सिनियर टिममा खेलिसकेका आयुष घलान, सुमित श्रेष्ठ, कृतिषरत्न छुन्जु र निराजन धामीसमेत समेटिएका छन् । आयुष हाल बंगलादेशमा छन् । उनी त्यहाँको शीर्ष डिभिजनको लिग खेल्न बंगलादेश पुलिस क्लबमा आवद्ध भइ सकेका छन् ।
घोषणा भएको टिमको गोलकिपरमा कृशल मोक्तान, अमित तमाता र बिशाल केसी छन् । त्यसैगरी डिफेन्डरतर्फ विवेक गुरुङ, विशाल नेपाली, लाहान सुब्बा, निग्मा लामा, राम थापा, शंकर थारु र सेमन्ता थापा परेका छन् ।
यी सबैजसो खेलाडीले उमेर समूहको साफ च्याम्पियनसिपमा नेपालको प्रतिनिधित्व गरिसकेका छन् । मिडफिल्ड सम्हाल्ने जिम्मेवारीमा अभिषेक सेङ्ताङ, एरन थापा, निराज कार्की, दीपेश गुरुङ, पूजन थापा, सञ्जीव लामा, सन्तोष खत्री र सुजन मगर रहेका छन् ।
आक्रमणको जिम्मेवारी रोहन खड्गी र निराजन धामीको रहनेछ। नेपालले यो प्रतियोगितामा एसियन कपको अन्तिम चरणमा स्थान बनाउन ताजिकिस्तानमा प्रतिस्पर्धा गर्नेछ। नेपाल रहेको समूह एचमा आयोजक ताजिकिस्तानसँगै फिलिपिन्स र सिरिया रहेका छन्।
