काठमाडौं । ठूला साना व्यवसायी हुन्, सेलिब्रेटी वा कुनै संघ-संस्थाले सामाजिक सञ्जालबाटै आफ्नो उपस्थिति देखाउछन्।
प्रचारप्रसारका साथै व्यापक समर्थन पाइने भएपछि राम्रा कुरालाई विश्वसामू देखाउन सामाजिक सञ्जाल महत्वपूर्ण रहेको छ। अझ खेलकुदका लागि सामाजिक सञ्जाल फ्यान कमाउने उत्कृष्ट प्लाटफर्म हो। तर, खेल प्रवर्द्धनमा लाग्नुपर्ने अखिल नेपाल फुटबल संघ-एन्फाले सामाजिक सञ्जालमा आम दर्शकको उपस्थितिलाई बेवास्ता गर्दै कमेन्ट सेक्सन नै बन्द गरेको छ।
तपाईंलाई लाग्छ- कुनै पनि सार्वजनिक संस्थाले सामाजिक सञ्जालमा प्राप्त हुने आलोचनात्मक प्रतिक्रिया निषेध गर्नु समस्याको समाधान हो ? यसले त झन् ती संस्थालाई गैरजिम्मेवार बनाउँछ । नेपालमा सर्वाधिक लोकप्रिय मध्येको एक फुटबलको नियमनकारी निकाय एन्फालाई यो कुरा कसले बुझाइदिने ? सिधै विषयमा प्रवेश गरौं ।
तपाईं नेपाली फुटबलको डाइ हार्ट फ्यान हुनुहुन्छ, फुटबलसम्बन्धी हरेक गतिविधिमा चासो राख्नुहुन्छ । टिमको हार जित, फुटबलबारे गरिएका पोस्टमा प्रतिक्रिया जनाउन चाहनुहुन्छ । ती प्रतिक्रिया कहिले राम्रा हुन्छन्, कहिले केही आक्रोशले भरिएका हुन सक्छन् ।
कमेन्ट्सलाई मज्जाले व्यवस्थापन गर्न सकिन्छ । त्यसका लागि स्मार्ट मिडिया टिम आवश्यक पर्छ । तर एन्फाले भने उल्टो बाटो अपनाएको छ । फुटबल विकासभन्दा आफ्नो व्यक्तिगत विकासमा ध्यान दिएको भन्ने आरोप खेपिरहेको एन्फा नेतृत्वले अहिले आफ्नो आधिकारिक फेसबुक पेजको कमेन्ट सेक्सन अफ गरेको छ ।
यही साउन ५ गते अन्डर-ट्वेन्टी महिला साफ च्याम्पियनसिपको निर्णायक खेलमा नेपाल बंगलादेशसँग पराजित भयो । फाइनल सरह रहेको लिगको अन्तिम खेलमा बंगलादेशसाग ४-० गोलले पराजित भएपछि नेपाल उपाधि जित्नबाट चुक्यो ।
एन्फाले प्रभावकारी रूपमा काम गर्न नसक्दा टिमले अन्तर्राष्ट्रियस्तरमा सफलता प्राप्त गर्न नसकेको समर्थकको बुझाइ छ । जसका कारण उनीहरूले सामाजिक सञ्जालमा एन्फाको ब्यापक आलोचना गरे । यिनै आलोचनाबाट तर्सिएर एन्फाले कमेन्ट सेक्सन अफ गर्ने अपरिपक्व निर्णय लियो ।
महिला राष्ट्रिय टिमको कप्तान चयन विवाद, प्रशिक्षक प्याटि्रक डि वाइल्डको अन्तर्वार्ताको विषयमा पनि समर्थकले मत ब्यक्त गरे । भद्दा, अमर्यादित, अशिस्ट, असभ्य कमेन्टसलाई व्यवस्थित गर्ने अनेक उपाय छन् । तर एन्फा त्यसतर्फ प्रवेशै नगरी सिधै कमेन्टस ब्लक गर्ने अलोकतान्त्रिक निर्णयतर्फ लाग्यो ।
यस्तो त्यति बेला हुन्छ जब सार्वजनिक चासोका संस्थामा आसिन पदाधिकारी समर्थकलेे सोधेका प्रश्नको जवाफ दिन नसक्ने अवस्थमा पुग्छ । समर्थकले व्यक्तिगतभन्दा पनि एन्फा र फुटबल विकासमा चिन्ता जाहेर गर्दै प्रतिक्रिया जनाउने गर्छन् ।
उनीहरूको आवाज रोक्नु अभिव्यक्ति स्वतन्त्रताप्रति अंकुश लगाउने स्वेच्छाचारी निर्णय हो । लोकतन्त्रको सुन्दर पक्ष प्रश्न र आलोचना सुन्नु हो । भाग्नु होइन् । तर एन्फा आलोचनाबाट भागेको छ ।
एन्फाले सामाजिक सञ्जाललाई आफ्नो मुख्य दुस्मन मानिरहँदा, अर्को लोकप्रिय खेल क्रिकेटले भने यसैलाई प्रयोग गरेर अन्तर्राष्ट्रियरूपमा ख्याति कमाइरहेको छ । नेपाल क्रिकेट संघ-क्यानले आफ्नो फेसबुकलाई समर्थकसम्म पुग्ने मुख्य माध्यम बनाएको छ ।
क्रिकेट समर्थकले, क्यानका हरेक सूचना फेसबुकमार्फत् प्राप्त गर्छन् । क्यानलाई पनि गाली र आलोचनात्मक प्रतिक्रिया नआउने होइनन् । क्यानले, लगातार दोस्रो वर्ष आइसीसीबाट डिभिजटल फ्यान इन्गेजमेन्ट अवार्ड हात पारिसक्यो ।
सामाजिक सञ्जालमा समर्थकको अत्यधिक पहुँच हुँदा क्यानलाई फाइदै-फाइदा भएको छ ।
