काठमाडौं । दोस्रो संस्करणको महिला कबड्डी विश्वकप-२०२५ अनिश्चितकालका लागि स्थगित भएको छ ।
यही साउन १८ गतेदेखि २५ गतेसम्म भारतको हैदराबादमा हुने तालिका रहेको प्रतियोगिता स्थगित गरिहेको हो । भारतीय कबड्डी फेडेरेसनले आकस्मिक रूपमा प्रतियोगिता स्थगनको निर्णय गरेको हो ।
फेडेरेसनले सहभागी देशहरूलाई पठाएको पत्रमा सीमित तयारी समय र प्रशासनिक कारण देखाउँदै प्रतियोगिता हालका लागि स्थगित गरिएको उल्लेख छ । यो निर्णय "खेलको दीर्घकालीन हितमा गरिएको" दाबी समेत गरिएको छ ।
विश्वकपमा सहभागी हुन १४ खेलाडीसहित १८ सदस्यीय नेपाली टोली २ साउन भारत गएको थियो । विश्वकप स्थगित भए पनि नेपालले त्यहाँ १ महिनाभन्दा लामो समय प्रशिक्षण गर्ने मुख्य प्रशिक्षक विष्णुदत्त भट्टले बताउनुभयो ।
मिसन २०२६ अन्तर्गत जापानमा हुने २०औं एसियाली खेलकुदमा पदक जित्ने लक्ष्य राखेको नेपाली महिला कबड्डी टोलीले त्यसैको तयारीलाई निरन्तरता दिँदै भारतमै थप समय विताउन लागेको भट्टले जानकारी दिनुभयो ।
विश्वकपमा नेपालसहित भारत, युगान्डा, जर्मनी, चाइनिज ताइपेइ, होल्यान्ड, जन्जिबार, इरान, जापान, पोल्यान्ड, केन्या, अर्जेन्टिना र थाइल्यान्ड सहभागी हुने तालिका थियो ।
१३ वर्षपछि हुन लागेको कबड्डी विश्वकप स्थगित भएपछि सहभागी राष्ट्रहरूले यो घटना निराशाजनक भएको प्रतिक्रिया दिएका छन् । महिला कबड्डी विश्वकपको पहिलो संस्करण सन् २०१२ मा भारतको पटनामा आयोजना गरिएको थियो ।
त्यसयता लामो समयसम्म प्रतियोगिता नहुँदा २०२५ संस्करणलाई महिला कबड्डीको पुन:उत्थानका रूपमा हेरिएको थियो । नेपाल कबड्डी संघका महासचिव अरविन्द झाका अनुसार यो प्रतियोगिता अब नोमेम्बर डिसेम्बरमा प्रो कबाड्डी लिगपछि आयोजना गर्ने सम्भावना छ।
