काठमाडौं । स्कटल्यान्डमा सञ्चालन भइरहेको आईसीसी विश्वकप लिग टू प्रतियोगितामा सहभागी नेपाली राष्ट्रिय क्रिकेट टोलीलाई धक्का लागेको छ । टोलीका दुई महत्त्वपूर्ण खेलाडी सोमपाल कामी र गुल्सन झा प्रशिक्षणका क्रममा घाइते भएका छन् ।
नेपाल क्रिकेट संघ, क्यानले सोमपाल कामीको दायाँ हातमा र गुल्सन झाको घुँडामा चोट लागेको जानकारी दिएको छ । चिकित्सकको परामर्शपछि दुवै खेलाडीलाई प्रतियोगिताबाट बाहिर राखिएको छ ।
चोटका कारण सोमपाल र गुल्सनले आईसीसी विश्वकप लिग २ अन्तर्गत जारी नेदरल्यान्ड्सविरुद्धको खेल गुमाएका छन् । साथै, त्यसपछिको टी-ट्वेन्टी आई त्रिकोणीय शृङ्खलाका सम्पूर्ण खेलमा पनि उनीहरू सहभागी हुन नसक्ने भएका छन् ।
यो चोटले जारी प्रतियोगितामा नेपाली टोलीको प्रदर्शनमा असर पार्न सक्ने सम्भावना रहेको छ । टोलीले अब यी दुई महत्त्वपूर्ण खेलाडीबिना नै बाँकी खेल खेल्नुपर्नेछ ।
