भोजपुर । विभागीय टोली नेपाल एपीएफ क्लब भारतको जर्जियन फुटबल क्लबलाई पराजित गर्दै भोजपुरमा जारी मेयरकप फुटबल प्रतियोगिताको फाइनलमा प्रवेश गरेको छ ।
बिहीबार भएको सेमिफाइनलमा एपीएफले १ - ० गोलअन्तरको कठिन जित हात पारेको हो । पहिलो हाफमा दुवै टिमले गोलरहीत बराबरी खेलेका थिए ।
नियमित समयमा पनि दुवै टिमबाट गोल हुन नसक्दा अतिरिक्त समयमा एपीएफका समिरराज ठोकरले निर्णायक गोल गरे । समिरराज नै म्यान अफ दी म्याच घोषित भए ।
अब एपीएफले उपाधिका लागि आज हुने भगवती स्पोर्टस क्लब खोटाङ र चर्च ब्वाइज युनाइटेडबीचको विजेतासँग प्रतिस्पर्धा गर्नेछ ।
प्रतियोगिताको विजेताले पाँच लाख र उपविजेताले तीन लाख रुपैयाँ प्राप्त गर्नेछन् । प्रतियोगितामा आठ टिम सहभागी छन् ।
