काठमाडौं । इंडियन प्रिमियर लिग-आइपीएल २०२५ को १३ औं खेलमा पञ्जाब किङ्सले लखनऊ सुपर जायन्ट्सलाई ८ विकेटले हराएको छ। लखनऊको अटल बिहारी वाजपेयी स्टेडियममा पञ्जाबले टस जितेर पहिले फिल्डिङ गर्ने निर्णय गरेपछि लखनऊले पहिले ब्याटिङको अवसर पाएको थियो।
लखनऊले दिएको एक सय ७२ रनको लक्ष्य १६ ओभर २ बलमा पुरा गरेर पञ्जाबले जित हाँसिल गरेको हो। लखनऊले खेलमा राम्रो सुरुआत गर्न नसके पनि ७ विकेट गुमाएर एक सय ७१ रन बनाएको थियो।
ओपनर मिचेल मार्स शून्यमा आउट भए। उनलाई अर्षदिप सिंहले पहिलो ओभरमा मार्को यानसनबाट क्याचआउट गराए। त्यसैगरी अर्का ओपनर एडन मारकरमले २८ रनको योगदान गरेका थिए।
उनलाई फग्युसनले बोल्ड गरेका हुन्। यता आईपिएलका सबैभन्दा महँगा खेलाडी रिषभ पन्त दुई रनमै आउट हुँदा लखनउलाई सबैभन्दा ठूलो धक्का लागेको हो। उसले तीन विकेट गुमाउँदा ३५ रन मात्रै बनाएको थियो।
पहिलो पावर प्लेको समाप्तिमा तीन विकेट क्षतिमा ३९ रन मात्रै बनाएको थियो। त्यसपछि निकोलस पुरन र आयुष बोडोनीले सम्हालिर खेल्ने प्रयास गरे। उनीहरूले ५४ रनको साझेदारी गरे। जसक्रममा निकोलसले ४४ रनको योगदान गरेका थिए भने बोडोनीले पनि ४१ रन बनाएका थिए। डेभिड मिलरले १९ र अब्दुल समदले २७ रनको योगदान गरे।
अर्षदिपले ४ ओभरमा तीन विकेट लिए। लकी फग्र्युसन, मार्को यानसन, युजवेन्द्र चहल र ग्लेन म्याक्सवेलले एक एक विकेट लिए। जवाफमा ओपनर प्रियन्स आर्य ८ रनमै बाहिरिए पनि बाँकी खेलाडीले राम्रो प्रदर्शन गरे।
प्रभसिमरन सिंहले ६९ रनको योगदान गरे भने श्रेयस अयरले अविजित ५२ रन बनाएर टोलीलाई जितसम्म पुर्याएका हुन्। नेहल वाधेराले पनि अन्तिममा अविजित ४३ रन जोडे। बलिङमा दिग्वेस राठीले दुइ विकेट लिए पनि बाँकी बलरले विकेट लिन सकेनन् र खर्चिलासमेत सावित भए। जारी लिगमा लखनऊको यो तेस्रो प्रतिस्पर्धा थियो भने पंजाबको दोस्रो ।
पञ्जाबले आफ्नो पहिलो खेलमा गुजरात टाइटन्सलाई पराजित गरेको थियो । गएरातिको जितसँगै उसले २ खेलबाट चार अंक बनाएको छ। लखनऊ पहिलो खेलमा दिल्ली क्यापिटल्ससँग पराजित भए पनि दोस्रो खेलमा सनराइजर्स हैदराबादलाई हराएको थियो। उसको तीन खेलबाट २ अंक मात्रै छ।
