'बी' डिभिजन लिग फुटबल : प्लानिङ ब्वाइज युनाइटेडले लगातार चौथो जित

चैत्र २०, २०८१ |खेल ब्युरो
'बी' डिभिजन लिग फुटबल : प्लानिङ ब्वाइज युनाइटेडले लगातार चौथो जित

काठमाडौं । सहिद स्मारक 'बी' डिभिजन लिग फुटबलमा प्लानिङ ब्वाइज युनाइटेडले लगातार चौथो जित हात पारेको छ ।

सातदोबाटोस्थित एन्फा मैदानमा आज भएको खेलमा प्लानिङ ब्वाइजले ब्वाइज युनियन क्लबविरुद्ध २-१ गोलअन्तरको जित हात पारेको हो । खेलको १२औं मिनेटमा प्रतापसिंह राईको गोलमार्फत् प्लानिङ ब्वाइजले अग्रता लिएको थियो । फागुराम थारुको थ्रु पासलाई प्रतापले गोलमा परिणत गरेका थिए । दोस्रो हाफको सुरुआतमै सञ्जिव लामाले ब्वाइज युनियनका लागि बराबरी गोल फर्काए ।

५४औं मिनेटमा रुजन न्यौपानेले प्रतापको कर्नरलाई हेडमार्फत पोस्टको दिशा दिएपछि प्लानिङ ब्वाइजले २-१ को अग्रता बनायो । त्यसपछि दुबै टिमबाट थप गोल हुन नसकेपछि प्लानिङ ब्वाइजले रोमाञ्चक जित हात पार्‍यो ।

जितसँगै चार खेलमा १२ अंक जोडेको प्लानिङ ब्वाइज शीर्षस्थानमा उक्लिएको छ । उसले दोस्रो स्थानको श्री भगवती क्लबमाथि दुई अंकको अग्रता बनाएको छ । पहिलो पराजय बेहोरेको ब्वाइज युनियन चार खेलबाट तीन अंकका साथ नवौं स्थानमा यथावत छ ।

आजै सम्पन्न पहिलो खेलमा वीरगन्ज युनाइटेडले बाँसबारी क्लबलाई २-१ गोल अन्तरले पराजित गरेको थियो ।