काठमाडौं । नेपाल प्रहरीले काठमाडौंको तीनकुने क्षेत्रमा अपराधिक उद्देश्यले राजावादी समूहले चैत १५ गते कार्यक्रम गरेकाले गोली चलाउनु परेको दाबी गरेको छ ।
प्रहरी मुख्यालयमा हिजो आयोजित पत्रकार सम्मेलनमा प्रवक्ता दिनेश आचार्यले विमानस्थल र संसद् भवन कब्जा गर्ने उद्देश्यसहित राजावादी समूहले आपराधीक समूह खटाएको जानकारीमा आएपछि गोली चलाउनुपरेको बताउनुभयो ।
प्रदर्शनमा सहभागीहरुले सर्वसाधारणका घरमा आगजनी गरेको, सञ्चार गृह तथा विमानस्थलको इन्धन डिपोमा समेत आगजनी गर्ने तयारी गरेकाले न्यून बल प्रयोग गरेको प्रहरीको भनाइ छ ।
कार्यक्रम आयोजनास्थलबाटै आयोजकले नेताको घर कब्जा र आक्रमणको घोषणा गरेअनुसार विमानस्थल, निजी घर र संसद् भवनसँगै भाटभटेनी सुपरमार्केटमा लुटपाट गर्ने समूह नै परिचालित भएको दाबी प्रहरीको छ ।
आपराधिक घटना नियन्त्रण गर्न ५८ राउण्ड गोली चलाइएको र त्यसमा २० जनाको घाइते भएको प्रहरीले जानकारी दिएको छ । घटनामा संलग्नहरुमाथि आपराधिक कसुरमा कारबाही हुने भन्दै प्रहरीले भीडबाट भागेका मुख्य आरोपी दुर्गा प्रसाईं पनि पक्राउ पर्ने जनाएको छ ।
गृह मन्त्रालयले संकलन गरेको विवरण अनुसार तीनकुन, काटेश्वर र जडिबुटी क्षेत्रका ४० घरमा क्षति पुगेको छ । क्षति भएका सवारी साधनको विवरण पीडित तथा कार्यालयहरुसँग लिने काम भइरहेको छ ।
त्यस्तै घटनामा संलग्न राप्रपाका वरिष्ठ उपाध्यक्ष रविन्द्र मिश्र र महामन्त्री धवलशमशेर जबरासहित ५९ जना पक्राउ परेका छन् । उनीहरूमाथि अदालतको अनुमतिमा थप ६ दिन म्याद लिएर अनुसन्धान भइरहेको छ ।
यसैबीच जिल्ला प्रशासन कार्यालय काठमाडौंले मृतक सुरेश रजक र सविन महर्जनका परिवारलाई जनही १० लाख रुपैयाँ राहत दिन सरकारलाई सिफारिस गरेको छ ।
