काठमाडौं । चोटको कारण लामो विश्रामपछि फर्किएका बुकायो साकाले मैदान प्रवेश गरेको सात मिनेटमा गोल गर्दै आर्सनललाई फुलहमविरुद्ध २-१ को जित दिलाएका छन्।
इंग्लिस प्रिमियर लिग इपीएलमा खेलको ३७औं मिनेटमा मिकेल मेरिनोले गनरलाई अग्रता दिलाएका थिए। उनले खेलमा इथान न्वानेरीको कटब्याक पासलाई कर्नरमा डिफ्लेक्ट गर्दै आर्सनलका लागि पहिलो गोल गरेका थिए। इंग्ल्याण्डका फरवार्ड साका दोस्रो हाफमा बेञ्चबाट मैदान छिरेका थिए।
यतिबेला आर्सनल १-० ले अगाडि थियो। खेलको ७३औं मिनेटमा ग्याब्रिएल मार्टिनेलीको पासलाई पोस्टको टाढाको कुनाबाट हेडर गोल गर्दै साकाले आर्सनललाई २-० को अग्रता दिलाएका हुन्।
यता, फुलहमका लागि स्टपेज समयमा रोड्रिगो मुनिजले गोल फर्काएका थिए। उनको प्रहार विलियम सालिबाको टचमा डिफ्लेक्ट हुँदै गोलरक्षक डेभिड रायालाई छक्याउँदै जालिमा पुगेको थियो। यो जितसँगै आर्सनलले शीर्षस्थानको लिभरपुलसँगको अंक अन्तरलाई नौ मा झारेको छ।
यद्यपि, आर्सनलका लागि यो दिन मिश्रित रह्यो। साकाको पुनरागमन सकारात्मक भएपनि पहिलो हाफमै सेन्टर ब्याक ग्याब्रिएल चोटग्रस्त हुँदै मैदान छाड्न बाध्य भए। च्याम्पियन्स लिगको क्वाटर-फाइनलमा रियल म्याड्रिडविरुद्धको महत्त्वपूर्ण खेलअघि उनको चोट म्यानेजर मिकेल आर्टेटाका लागि चिन्ताको विषय बनेको छ।
फुलहमले सिंगो खेलभरि राम्रो रक्षात्मक रणनीति अपनाएको थियो। तर, उसले गोल गर्ने सुनौलो मौकासमेत गुमाए, जब सब्स्टिच्युट खेलाडी मुनिजले ओपन पोस्टमा ६ यार्डबाट गरेको हेडर बाहिरिएको थियो।
अब आर्सनलले प्रिमियर लिगमा शनिबार एभर्टनसँग प्रतिस्पर्धा गर्नेछ र त्यसपछि मंगलबार रियल म्याड्रिडविरुद्धको क्वाटर-फाइनलको पहिलो लेगको तयारी गर्नेछ।
प्रिमियर लिगमा गएराति नै भएको अर्को खेलमा नटिङ्घम फरेस्टले म्यानचेस्टर युनाइटेडलाई १-० ले हराएको छ। खेलको पाँचौ मिनेटमा बनाएको अग्रता जोगाएर उसले जित हाँसिल गरेको हो।
