काठमाडौं । डिफेन्डिङ च्याम्यिन ललितपुर सिटी एफसीले नेपाल सुपर लिग एनएसएलमा पहिलो जित हात पारेको छ । दशरथ रंगशालामा आज सम्पन्न खेलमा ललितपुरले पोखरा थण्डर्सलाई ३-२ गोल अन्तरले पराजित गरेको हो । पोखराको यो लगातार दोस्रो हार हो ।
खेलको १०औं मिनेटमा जोनाथान कान्टिलानाले प्रहार गरेको कर्नर पोखराका किपर प्रिसोलाई लागेर डिफ्लेक्ट हुँदै गोल भएपछि ललितपुरले सुरुवाती अग्रता बनाएको थियो । ४२औं मिनेटमा पोखराले बराबरी गोल फर्कायो । मार्की प्लेअर समिर तामाङले पोखराका लागि बराबरी गोल गरे ।
पहिलो हाफको अतिरिक्त समयमा ललितपुरले पुन अग्रता लियो । कान्टिलानाले मैदानको मध्यभागबाट दिएको लामो पासमा इमोहले वान भर्सेस वानको अवस्थामा सहजै गोल गरेका थिए ।
खेलको ७५औं मिनेटमा ललितपुरले तेस्रो गोल थप्यो । कान्टिलानाले ललितपुरका लागि तेस्रो गोल थपे । इन्जिुरी समयको अन्त्यतिर पोखराका समिरले दायाँ भागबाट दिएको पासमा जोए आइडोले गोल गर्दै गोल अन्तर घटाए पनि हार टार्न कसेन र अन्ततः ललितपुरले ३-२ को रोमाञ्चक जित हात पार्यो ।
जितसँगै २ खेलमा १ जित र १ बराबरीसहित ललितपुर ४ अंक जोडेर लिगको शीर्ष स्थानमा उक्लिएको छ । २ खेलमा अंकविहीन पोखरा पुछारमा छ । ललितपुरले प्रतियोगिताको उद्घाटन खेलमा काठमाडौं रेजर्ससँग २-२ गोलको बराबरी खेलेको थियो भने पोखरा एफसी चितवनसँग २-० ले पराजित भएको थियो ।
