काठमाडौं । विद्यालय शिक्षा ऐन जारी गर्न माग गर्दै सामुदायिक विद्यालयका शिक्षक तथा कर्मचारीहरू हिजोदेखि अनिश्चितकालीन शैक्षिक सडक आन्दोलनमा उत्रिएका छन् ।
नयाँ शैक्षिक सत्र र भर्ना अभियान नजिकिइरहेका बेला देशभरका शिक्षकहरू एसईईको उत्तरपुस्तिका परीक्षणसमेत बहिस्कार गरेर काठमाडौं केन्द्रित आन्दोलनमा होमिएका हुन् ।
सरकारले भने शिक्षकका मागप्रति गम्भीर रहेको भन्दै आन्दोलन फिर्ता लिन आग्रह गरेपनि नेपाल शिक्षक महासंघको आह्वानमा देशभरका सामुदायिक विद्यालयका शिक्षक तथा कर्मचारी अनिश्चितकालीन आन्दोलनमा उत्रिएका हुन् ।
उनीहरुले बुधबार काठमाडौंको माइतीघरदेखि बानेश्वरसम्म प्रदर्शन गरे । वर्षौंदेखि कार्यरत शिक्षक कर्मचारीको पेशागत हित र अधिकारको सुनिश्चितता र सरकारसँग भएको सम्झौता अनुसार शिक्षा ऐन जारी गर्नुपर्ने माग गर्दै उनीहरुले प्रदर्शन गरेका हुन् । सरकार र संसद्लाई दबाब दिन सडक आन्दोलनमा उत्रन बाध्य भएको उनीहरूको भनाइ छ ।
शिक्षकले भने जस्तो संसद्बाट तत्काल विद्यालय शिक्षा विधेयक पारित हुने अवस्था छैन । यो विधेयक संसदीय समितिमै अलपत्र छ । त्यसमाथि संसद्को हिउँदे अधिवेशनसमेत अन्त्य भइसकेको छ ।
तर शिक्षकहरु सबै राजनीतिक दलहरुमाथि दबाब सिर्जना गर्न भन्दै आन्दोलनमा होमिएका हुन् । महासंघको अगुवाइमा भएको आन्दोलनमा स्थायी, अस्थायी, राहत, बालविकास, साविक उच्चमावि, अनुदान, प्राविधिक धारलगायतका शिक्षक र कर्मचारी सहभागी छन् । एसईईको उत्तरपुस्तिका परीक्षणसमेत उनीहरूले बहिस्कार गरेका छन् ।
सरकारले भने शिक्षकहरुका मागप्रति सकारात्मक रहेको प्रतिक्रिया दिएको छ । संसदीय समितिमा विचाराधीन विद्यालय शिक्षा विधेयक टुंगोमा पुर्याउने पुग्न लागेका बेला आन्दोलनबाट दबाब सिर्जना गर्नु उचित नहुने शिक्षा मन्त्रीको भनाइ छ ।
ठूलो संख्यामा शिक्षक तथा कर्मचारीहरू सहभागी प्रदर्शनका कारण बुधबार काठमाडौंको बानेश्वरदेखि माइतीघरसम्मको ट्राफिक अस्तव्यस्त बन्यो । उनीहरूले आन्दोलनलाई निरन्तरता दिने बताइरहेका छन् ।
यसले नजिकिँदो नयाँ शैक्षिक सत्र र भर्ना अभियानसमेत प्रभावित त हुँदैन भन्ने चिन्ता विद्यार्थी तथा अभिभावकमा देखिएको छ ।
