काठमाडौं । स्पेनिस जायन्ट रियल मड्रिड कोपा डेल रे फुटबलको फाइनलमा प्रवेश गरेको छ। गएराति भएको सेमिफाइनल खेलमा रियल सोसिडाडलाई समग्रमा ५-४ ले हराउँदै रियल फाइनलमा प्रवेश गरेको हो।
खेलको निर्धारित र अतिरिक्त समय ४-४ को रोमाञ्चक बराबरी भएपनि अघिल्लो लेगमा खेलको नतिजा जोडेर रियल विजयी भएको हो।
खेलको १६ मिनेटमा नै सान्टियागो बर्नाबेउमा सोसिडाडका अन्देर बेरेनेचेयाले पाहुँना टोलीलाई अग्रता दिलाएका थिए। तर उनले दिलाएको अग्रता रियलका एन्डि्रकले खेलको ३०औं मिनेटमा तोडेका थिए।
एन्डि्रकले भिनिसियस जुनियरको पासमा गोल फर्काएका हुन्। यससँगै पहिलो हाफको खेल १-१ गोलको बराबरीमा समाप्त भएको थियो। दोस्रो हाफमा दुवै टिमले ३-३ गोल फर्काए।
खेलको ७२औं मिनेटमा रियलका डिफेन्डर डेविड अलावाले आत्मघाति गोल गरेपछि रियले २-१ ले पछि परेको थियो। माइकल ओयरजवालले ८०औं मिनेटमा अर्को गोल थप्दा घरेलु मैदानमा नै रियल हारनजिक पुगेको हो। तर ८२औं मिनेटमा जुड बेलिङ्घम र ८६औं मिनेटमा अउरेलियन छुवामेनीले गोल गरे।
त्यसपछि ओयरजवालले इन्ज्युरी समयको तेस्रो मिनेटमा गोल गरेका थिए। त्यो गोलपछि खेलमा सोसिडाडको चार र रियलको तीन गोल भएको थियो। तर यी दुई टिमबीच गत हप्ता भएको पहिलो लेगको खेल रियलले १-० ले जितेको थियो।
त्यो नतिजासमेत जोड्दा ४-४ को बराबरी भएपछि खेल अतिरिक्त समयमा पुगेको हो। अतरिक्त समयको एक सय १५ औं मिनेटमा एन्टोनियो रुडिगरले गोल गरेर खेललाई ५-४ मा समाप्त गरेका हुन्।
यससँगै रियल फाइनलमा प्रवेश गरेको हो। अब उसले फाइनलमा एट्लेटिको मडि्रड र बार्सिलोनाको विजेतासँग खेल्नेछ। फाइनल खेल अप्रिल २६ तारिखमा सेभियाको रंगशालमा आयोजना हुनेछ।
